ސަރުކާރުގެ ބައެއް ނިންމުންތަކާ ދެކޮޅަށް އެމްޑީޕީން މި ރަމަޟާން މަހު މާލޭގައި ކުރަމުން އަންނަ ސިލްސިލާ މުޒާހަރާތަކާއި ގުޅިގެން، އެޕާޓީގެ ދެ އެކްޓިވިސްޓުން މަރިޔަމް ޒުބައިރު (މަންދީ) އާއި ފާތިމަތު ޝިއުނާ ފުލުހަށް ހާޒިރުވުމަށް އަންގައި ޗިޓު ފޮނުވައިފި އެވެ. 

މި ދެމީހުން ފުލުހަށް ހާޒިރުވުމަށް އަންގައި ފޮނުވި ޗިޓުގައި ބަޔާންކޮށްފައިވާ ގޮތުން، ފުލުހުންގެ އިދާރާއަށް އެމީހުން ހާޒިރުކުރަނީ ގާނޫނާ ހިލާފަށް މާލޭގެ އެކި ސަރަހައްދުތަކަށް އެއްވެ އަޑުގަދަކޮށް މުޒާހަރާ ކުރުމުގެ އިތުރުން އާންމު ދަތުރުފަތުރަށް ދަތިވާ ގޮތަށް އަމަލު ކުރުމާއި ފުލުހުންގެ ވާޖިބު އަދާ ކުރުމަށް ހުރަސް އެޅި މައްސަލާގަ އެވެ. 

މާދަމާ މެންދުރު 1:30 އަށް މަންދީ ފުލުހަށް ހާޒިރުވުމަށް އަންގާފައިވާއިރު، ޝިއުނާ ފުލުހަށް ހާޒިރުވާން އަންގާފައި ވަނީ ހޯމަ ދުވަހުގެ 1:30 އަށެވެ. 

މަންދީ އާއި ޝިއުނާ ފުލުހަށް ހާޒިރުކުރުމަށް ނިންމާފައިވާއިރު، މުޒާހަރާއެއްގެ ތެރޭގައި ރައީސްގެ 16 އަހަރުގެ ފިރިހެން ދަރިކަލުންނަށް ނިސްބަތްކޮށް މަންދީ ދެއްކި ވާހަކައެއް ވަނީ ހޫނުވެފަ އެވެ. ރައީސްގެ ދަރިކަލުން ވޭޕް ބޭނުންކުރެއްވިކަމަށް ތުހުމަތުކޮށް ދެއްކި ވާޙަކަތަކާ ގުޅިގެން އެމަނިކުފާނުގެ އާއިލާގެ ފަރާތްޕުޅުން، މަންދީގެ މައްޗަށް ދައުވާ އުފުލުމަށް ނިންމައި މިއަދު އެކަން ވަނީ ހާމަކުރައްވާފަ އެވެ.