ސަރުކާރުން ފަށާ ޓެކްސީ ލައިނުގެ ހިދުމަތުގެ ފެންވަރު ރަނގަޅު ކުރުމުގެ ގޮތުން މާލޭގެ ކުދި މަގުތަކަށް ވަދެވޭ ވަރުގެ ސައިޒު ހުންނަ ކާރު ވެސް ގެންނާނެ ކަމަށް ދަތުރުފަތުރުގެ ވަޒީރު މުހައްމަދު އަމީން މިއަދު ރައްޔިތުންގެ މަޖިލީހުގައި ވިދާޅުވެއްޖެ އެވެ.

ވަޒީރު މަޖިލީހަށް ހާޒިރުވެ މެންބަރުންގެ ސުވާލުތަކަށް ޖަވާބުދެއްވަމުން ވިދާޅުވީ ސަރުކާރުގެ ޓެކްސީ ލައިނުގެ ހިދުމަތުގައި ހިމެނޭނީ އެއް ސައިޒެއްގެ ޓެކްސީތަކެއް ނޫން ކަމަށެވެ. ހަތަރު ވަރަކަށް ސައިޒު އުޅޭނެ އެވެ.

ބޭނުމަކީ މާލޭގެ ވަރަށް ކުދި މަގުތަކަށް ވެސް ވަދެވޭ ވަރުގެ ޓެކްސީތަކެއް ވެސް ހިމެނި، ހިދުމަތުގެ ފެންވަރު ރަނގަޅުކުރުން ކަމަށް ވަޒީރު ވިދާޅުވި އެވެ.

"ސަރުކާރުން ނިންމަވައިގެން މި އުފައްދާ ޓެކްސީ ލައިންގައި ހުންނާނީ އެއް ސައިޒެއް ނޫން. އުޅޭނެ ދެތިން ހަތަރު ސައިޒެއް. އެއީ ވަރަށް ކުދިކުދި މާލޭގެ މަގުތަކަށް ވެސް ވަދެވޭ ގޮތަށް،" ވަޒީރު ވިދާޅުވި އެވެ.

މި ހިދުމަތް ދޭނީ އެމްޓީސީސީންނެވެ. އެމްޓީސީސީއާއި ދަތުރުފަތުރުގެ ވުޒާރާއެކު އެއްބަސްވުމެއްގައި މިދިޔަ ފެބްރުއަރީ މަހު 15ގައި ސޮއިކުރި އެވެ. ނަމަވެސް އަދި ހިދުމަތް ދޭން ނުފަށަ އެވެ.