އެއްވެސް ބޯހިޔާވަހިކަމެއް ނެތި މާލެ ސަރަހައްދުގައި ދިރިއުޅެމުންދާ އުމުރުން 18 އަހަރުން މަތީގެ ހުރިހާ އެންމެންނަށް ބޯހިޔާވަހިކަން ފޯރުކޮށްދިނުމުގެ މަޝްރޫއަށް މި އަހަރު ހުޅުވާލާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސްް މުއިއްޒު މިހެން ވިދާޅުވީ ދައުލަތުގެ މީޑިއާއަށް ދެއްވި ހާއްސަ ބަސްދީގަތުމެއްގަ އެވެ.

މާލޭގެ ރަށްވެހިން ވެސް ހިމެނޭ ގޮތަށް، މާލެ ސަރަހައްދުގައި ދިރިއުޅޭ އުމުރުން 18 އަހަރުން މަތީގެ މީހުންގެ ތެރެއިން، ދާއިމީ ބޯހިޔާވަހިކަމެއް ނެތް މީހުންނަށް ގޯތި ނޫނީ ފްލެޓު ދިނުމަކީ އެމަނިކުފާނުގެ ރިޔާސީ ވައުދެކެވެ.

ރައީސް ވިދާޅުވީ އެ ސްކީމްގައި ހަމައެކަނި އޮންނާނެ ޝަރުތަކީ 18 އަހަރު ފުރުމާއި ބޯހިޔާވަހިކަމެއް ނެތުން ކަމަށެވެ. މި އަހަރު ނިމުމުގެ ކުރިން އެ ސްކީމަށް ކުރިމަތިލާން ހުޅުވާލައި، ގެދޮރު ލިބޭ ކަން ކަށަވަރުކަން ދިނުމުގެ ގޮތުން ލިޔުން ހަވާލުކުރާނެ ކަމަށް ވިދާޅުވި އެވެ.

"އެއްވެސް ބޯހިޔާވަހިކަމެއް ނެތް 18 އަހަރުން މަތީގެ ރައްޔިތުންނަށް، ފަސްޓް ހޯމްގެ ގޮތުގައި މާލެ ސަރަހައްދުން، ރަސްމާލެ ވެސް ހިމެނޭ ގޮތަށް ގޯތި ނޫނީ ފްލެޓް ކަށަވަރުކޮށްދިނުމަށްޓަކައި، ހުޅުވާލާނަން އަޅުގަނޑުމެން،" ރައީސް މުއިއްޒު ވިދާޅުވި އެވެ.