ރޭ ހިނގި އެކްސިޑެންޓެއްގައި 16 އަހަރުގެ ކުއްޖަކު މަރުވެއްޖެ އެވެ. 

މީޑިއާތަކަށް ފޮނުވި މެސެޖެއްގައި ފުލުހުން ބުނީ ބޮޑުތަކުރުފާނު މަގު، ބްރިޖު ލައިޓް ކައިރިން ބާރު ސްޕީޑެއްގައި ދުއްވާފައި ދިޔަ ސައިކަލެއް ކޮންޓްރޯލް ނުވެގޮސް ޕޭވްމަންޓް މައްޗަށް އަރައި އެސްކސިޑެންޓެއް ހިނގާފައިވާކަމުގެ މައުލޫމާތު ރޭ 1:39 ހާއިރު ރިޕޯޓްކޮށްފައިވާ ކަމަށެވެ. 

ފުލުހުން ބުނީ، އެކްސިޑެންޓް ހިނގިއިރު ސައިކަލު ދުއްވަން އިން 19 އަހަރުގެ ފިރިހެން މީހެއް ކަމަށާއި އޭނާގެ ފަހަތުގައި ހުރީ 16 އަހަރުގެ ފިރިހެން ކުއްޖެއް ކަމަށެވެ. އެއީ ދެ ދިވެހިން ކަމަށާއި އެ މީހުންނަށް ހޮސްޕިޓަލުގައި ފަރުވާދެމުންދަނިކޮށް 16 އަހަރުގެ ކުއްޖާ މަރުވެފައިވާ ކަމަށް ފުލުހުން ބުންޏެވެ. 

އެކްސިޑެންޓްވި ސައިކަލު ދުއްވީ އެ ކެޓަގަރީގެ ލައިސަންސް ނެތް މީހެއް ކަމަށާއި، މައްސަލަ ތަހުގީގުކުރަމުންދާ ކަމަށް ފުލުހުން ބުންޏެވެ.