މާލެއާއި އެކި އަތޮޅުތަކަށް ނެރުނު އޮރެންޖު އިންޒާރު ދަންމާލައިފިއެވެ.

މާލެ ހިމެނޭ ހެން ބައެއް އަތޮޅުތަކަށް ނެރުނު އޮރެންޖު އިންޒާރު މިރޭ ދަންމާލައިފިއެވެ.

މޫސުމާ ބެހޭ ގައުމީ އިދާރާ އިން ވިދާޅުވީ ބ. އަތޮޅުން ފެށިގެން ދ. އަތޮޅާ ހަމައަށް އޮރެންޖު އިންޒާރު ނެރުނީ މިރޭ ދަންވަރު 3:00 އިން ފެށިގެން މާދަމާ ހެނދުނު 7:00 އާ ހަމައަށެވެ. މި ގަޑިތަކުގައި ގުގުރުމާއެކު ބޯކޮށް ވާރޭ ވެހި، ފެން ބޮޑުވާނެ ކަމަށް މެޓް އޮފީހުން ލަފާކޮށްފައިވެއެވެ.

އޮރެންޖު އިންޒާރު ނެރެފައިވަނީ މާލޭގެ އިތުރުން ޅ. އަތޮޅާއި ބ. އަތޮޅާއި ކ. އަތޮޅާއި އއ. އަތޮޅާއި އދ. އަތޮޅާއި ފ. އަތޮޅާއި ވ. އަތޮޅާއި ދ. އަތޮޅަށާއި މ. އަތޮޅަށެވެ.

މާލެ އަށް މިރޭ ކުރި ވިއްސާރައިގައި ވަރަށް ބޮޑު ބައެއްގައި ފެން ބޮޑުވެ، ބައެއް ގޭގެއަށް ފެން ވަދެފައިވެއެވެ. އަދި ކ. ހުރާ، ކ. ހިންމަފުށި، ކ. ގުރައިދޫ އަދި ކ. ތުލުސްދޫގެ ގޭގެއަށް ފެން ބޮޑުވެ ގެއްލުންތަކެއް ވަނީ ލިބިފައެވެ.

ބޯކޮށް ވާރޭވެހި ފެންބޮޑުވުމާއި ގުޅިގެން ފެން ހިންދުމުގެ މަސައްކަތް

ބޯކޮށް ވާރޭވެހި ފެންބޮޑުވެ މާލޭގެ ގޭގެއަށް ފެން ވަންނާތީ އެމެންއެންޑީއެފްއިން ވެލި ބަސްތާ ޖަހަން ފަށައިފިއެވެ.

ރައީސް އޮފީހުގެ ތަރުޖަމާނު ހީނާ ވަލީދު އެކްސްގައި ކުރެއްވި ޕޯސްޓެއްގައި ވިދާޅުވީ ބޯކޮށް ވާރޭވެހި މާލޭގެ ބައެއް މަގުތަކުގައި ފެންބޮޑުވުމާގުޅިގެން ކަމާބެހޭ މުއައްސަސާތައް ގުޅިގެން ފެންހިންދުމުގެ މަސައްކަތާއި ވެލި ބަސްތާތައް ޖެހުމުގެ މަސައްކަތް ކުރަމުންދާ ކަމަށެވެ.

"ވިއްސާރައިގެ ސަބަބުން ރައްޔިތުންނަށް ދިމާވާ ދަތިތައް ކުޑަކުރުމަށާއި ރައްޔިތުންގެ ޙާލު ގާތުން ބަލާ އެހީތެރިކަން ފޯރުކޮށްދިނުމުގެ މަސައްކަތް ސަރުކާރުގެ ކަމާބެހޭ ހުރިހާ އިދާރާތައް ގުޅިގެން ޚާއްޞަ ސަމާލުކަމަކާއެކު ދަނީ ކުރިއަށް ގެންދަވަމުން." ހީނާ ވިދާޅުވިއެވެ.

ފުލުހުންގެ އިރުޝާދު

ފުލުހުން ސޯޝަލް މީޑިއާގައި ކުރި ޕޯސްޓެއްގައި ވިދާޅުވެފައިވަނީ ބޯކޮށް ވާރޭވެހި މާލޭގެ މަގުތަކުގައި ފެންބޮޑުވެ، ބައެއް ގޭގެއަށް ފެން ވަނުމުގެ ހާދިސާތައް ހިނގަމުން ދާތީ ބަރު އުޅަނދު މާލޭގެ މަގުތަކުގައި ނުދުއްވުމަށާއި ހަތަރު ފުރުލީ އުޅަނދު ޒަރޫރީ ބޭނުންތަކުގައި މެނުވީ ނުދުއްވުމަށް ދަންނަވާ ކަމަށެވެ.

ވިއްސާރައިގެ ސަބަބުން ފެންބޮޑުވާނެ ކަމަށް ލަފާކޮށް މެޓް އޮފީހުން ވަނީ ބ. އަތޮޅުން ފެށިގެން ދ. އަތޮޅާ ހަމައަށް އޮރެންޖު އެލާޓު ނެރެފައެވެ.