މޯލްޑިވްސް ބޮރޮޑްކާސްޓިންގް ކޮމިޝަންގެ މެމްބަރުކަމުގެ މަގާމަށް ކުރިމަތިލުމުގެ ފުރުސަތު ރައީސް އޮފީހުން މިއަދު ހުޅުވައިލައިފިއެވެ. 

ރައީސް އޮފީހުން ބުނެފައިވަނީ މޯލްޑިވްސް ބްރޮޑްކާސްޓިންގް ކޮމިޝަނުގެ މެމްބަރު މުހައްމަދު ފަޒީން ބ.ތުޅާދޫ/ހޭޒްލީން އިސްތިއުފާ ދެއްވައިފައިވާތީ، ހުސްވެފައިވާ މަގާމަށް މެމްބަރަކު އައްޔަން ކުރެއްވުމަށް ބޭފުޅަކު ކުރިމަތިލުމުގެ ފުރުސަތު މިހާރު ހުޅުވައިލައިފައިވާކަމަށެވެ. 

މިއަދުން ފެށިގެން މި މަހުގެ 15 އާއި ހިސާބަށް މި ފުރުސަތު ހުޅުވައިލައިފައި ވާކަމަށާއި، މިމަހުގެ 15 ވާ އަންގާރަ ދުވަހުގެ 12:00ގެ ނިޔަލަށް އެ ފުރުސަތު އޮންނާނެކަމަށް ރައީސް އޮފިހުން ބުނެފައިވެއެވެ. 

މެމްބަރުކަމަށް ހުށައެޅުމުގެ ފުރުސަތު ބަލައިގަންނާނީ ރައީސް އޮފީހުން އެކަމަށް ކުރިމަތިލުމަށް ދޫކުރާ ފޯމެއް ހުށައަޅައިގެންނެވެ. އަދި ފޯމު ލިބިލައްވާނީ ރައީސް އޮފީހުގެ ރިސެޕްޝަނުންނެވެ.  އަދި އެ ދީފައިވާ މުއްދަތުގެ ތެރޭގައި ރަސްމީ ބަންދު ދުވަސްތައް ފިޔަވައި އެހެން ދުވަސްތަކުގެ ހެނދުނު 08:30 އިން 12:00އަށް ރައީސް އޮފީހުން ފޯމު ދޫކުރުމާއި ބަލައިގަތުމުގެ މަރުހަލާ ކުރިއަށް ދާނެކަމަށް ބުނެފައިވެއެވެ.