ފޮނަދޫގައި މިއަދު އިމާމުވެ ހުކުރު ކުރެއްވި އިމާމުންގެ ތެރޭގައި ރައްޔިތުން މަޖިލީހުގެ ރައީސް އަބްދުއްރަހީމް އަބްދުﷲ ހިމެނިވަޑައިގެންފައިވެއެވެ.

ފޮނަދޫއަކީ އެ މަނިކުފާނުގެ އުފަން ރަށެވެ. މަޖިލީހަށް އިންތިހާބުވީ ފޮނަދޫ ދާއިރާގެ ގޮނޑިއަށެވެ.

އަބްދުއްރަހީމް އިމާމުވެ ހުކުރު ކުރެއްވީ އެރަށުގެ "މަސްޖިދުލް އުލާ" މިސްކިތުގައެވެ. މިއަދުގެ ހުކުރު ހުތުބާގެ މައުލޫއަކީ "ނަސްރުގެ މައްސަރު" މިއެވެ. 

މަޖިލީހުގެ ރައީސް އަބްދުއްރަހީމްގެ ދަރިކަލުން އިބްރާހީމް ފައިސަލް ފަތުރުވެރި ވަޒީރު ކަމުން ރައީސް މުހައްމަދު މުއިއްޒު ވަކިކުރެއްވި ފަހުން ގުޅުން ގޯސް ކަމަށް އަޑު ފެތުރެމުންދެ އެވެ.

ރައީސް މުއިއްޒު ވެރިކަމަށް ވަޑައިގެންނެވި އިރު އެންމެ އަރިސް ބޭފުޅަކަށް ހުންނެވީ އަބްދުއްރަހީމެވެ. ސަރުކާރު ހިންގާ ޕީއެންސީގެ ޗެއާޕާސަން އަބްދުއްރަހީމް ހުންނެވީ މި ސަރުކާރު ގެނައުމުގައި އެންމެ ކުރީ ސަފުގަ އެވެ.

އަބްދުއްރަހީމްގެ ސިޔާސީ މަސައްކަތް ފެއްޓެވީ ޑީއާރުޕީގަ އެވެ. އަބްދުއްރަހީމް ފާހަގަވީ ލ. އަތޮޅުގައި ތާއީދު ބޮޑު ސިޔާސީ ސަހުޝެއް ގޮތުގަ އެވެ. އަދި ކުރީގެ ރައީސް އަބްދުﷲ ޔާމީނުގެ ވަރަށް އަރިސް މިތުރެއް ގޮތުގަ އެެވެ.

ރައީސް ޔާމީނާ އަބްދުއްރަހީމް ގުޅުން ގޯސްވީ މި ސަރުކާރާއެކު، ޔާމީން ދޫކޮށްލައްވައި ރައީސް މުއިއްޒާ އެކު ހުންނަވަން އަބްދުއްރަހީމް ނިންމެވި ހިސާބުންނެވެ.

ކޮންމެ ގޮތަކަށް އަޑުތައް ފެތުރެމުން ދިޔަ ނަމަވެސް އަބްދުއްރަހީމް ހުންނަވާނީ މި ސަރުކާރާއެކު ކަމަށް އެ މަނިކުފާނު ގެންދަވަނީ ތަކުރާރުކޮށް ވިދާޅުވަމުންނެވެ.