ސުޕްރީމް ކޯޓުގެ ދެ ފަނޑިޔާރަކު ވަކިކުރަން ޖެހޭ ގޮތަށް ކޯޓުތަކުގެ ގާނޫނަށް ބަދަލު ގެންނަ ބިލަށް މަޖިލީހުގެ ހިތަދޫ މެދު ދާއިރާގެ މެމްބަރު، އަހުމަދު އަޒާން ވޯޓު ނުދެއްވި މައްސަލާގައި ހޫނުވެފައި ވަނިކޮށް، މަޖިލީހުގެ ބާރުގަދަ ދެ ކޮމެޓީ އަކުން އަޒާން ވަކިކޮށްފި އެވެ.

އަޒާން ވަނީ ބިލް ފާސްކުރަން ނެންގެވި ވަގުތު މަޖިލީހުގެ ތަޅުން ދޫކުރައްވާ ވަޑައިގެންފަ އެވެ.

ބިލު ބަލައިގަތުމުގެ ވޯޓުގައި ވެސް ބައިވެރިވެވަޑައިނުގަތް މެންބަރު އަޒާން ދެފަހަރެއްގެ މަތިން ޕީއެންސީގެ ތްރީލައިން ވިޕާ ހިލާފުވި މައްސަލާގައި ޕީއެންސީގެ ޕާލިމެންޓްރީ ގްރޫޕުގެ މެންބަރުން ތިއްބަވާ ވަޓްސް އެޕް ގްރޫޕުން ވެސް އަޒާން ބޭރުކޮށްފައި ވެއެވެ. 

މަޖިލީހުގެ ރިޔާސަތުން މިއަދު އިއުލާންކުރި ގޮތުގައި އަޒާން ވަކި ކުރައްވާފައި ވަނީ އެ މަޖިލީހުގެ މާލިއްޔަތު ކޮމެޓީންނާއި، ސަލާމަތީ ޙިދުމަތްތަކާއި ބެހޭ(241) ކޮމެޓީންނެވެ. އަޒާން ހަމަޖެއްސީ ޕެޓިޝަން ކޮމިޓީއާއި ސުލޫކު ކޮމިޓީއަށެވެ.

އޭގެ ބަދަލުގައި މާލިއްޔަތު ކޮމެޓީއަށް ހަމަޖައްސާފައި ވަނީ ހެންވޭރު އުތުރު ދާއިރާގެ މެމްބަރު، އަހުމަދު އައިފާން އަދި 241 ކޮމެޓީއަށް ވިލިމާލެ ދާއިރާގެ މެމްބަރު މުހައްމަދު އިސްމާއިލް އެވެ.

މައްސަލަ އާއި ގުޅިގެން އުފެދުނު ހަމަނުޖެހުމުގެ ތެރެއިންވެސް އަޒާން ބަޔާނެއް ވެސް ނެރުނެވެ. ބަޔާނުގައި އޭނާ ވިދާޅުވެފައިވަނީ ބިލަށް ވޯޓު ނުދެއްވީ ގާނޫނުއަސާސީއާ ހިލާފު ބިލެއް ކަމަށް ދެކެވަޑައިގަންނަވާތީ ކަމަށެވެ.

ނަމަވެސް ސަރުކާރަށް ކުރައްވާ ތާއީދު އެ ގޮތުގައި ދެމިއޮތް ކަމަށް ވެސް ބަޔާނުގައި އަޒާން ލިޔުއްވާފައިވެ އެވެ. އޭގެ ފަހުން އަޒާނާ ދެކޯލަށް، ޕީއެންސީގެ ހިތަދޫ މެދު ދާއިރާގެ ސްޓިއަރިން ކޮމެޓީން ވެސް ބަޔާނެއް ނެރުނެވެ. ސްޓިއަރިން ކޮމިޓީގެ ބަޔާނުގައި ބުނެފައިވަނީ އަޒާން ބިލަށް ވޯޓު ދެއްވާނެ ގޮތަކާ ގުޅޭ ގޮތުން ކުޑަމިނުން އެ ކޮމިޓީއާ ވެސް މަޝްވަރާކުރައްވާފައި ނުވާ ކަމަށެވެ.