ރައްޔިތުންގެ މަޖިލީހުގެ މެންބަރުންގެ މުސާރަ އާއި އިނާޔަތްތައް ކުޑަކުރަން ގޮވާލާ ޕެޓިޝަނެއްގައި ސޮއިކުރަން ފަށައިފިއެވެ.

އޮންލައިންކޮށް ސޮއިކުރެވޭ މި ޕެޓިޝަންގައި  މި ޕެޓިޝަންގައި ވަނީ ރައްޔިތުންގެ މަޖިލީހުގެ މެންބަރުންނަށް ލިބޭ މުސާރައާއި ކޮމެޓީ އެލަވަންސާއި ޕްރިމިއަމް ހެލްތު އިންޝުއަރެންސުގެ ސަބަބުން އިގްތިސޯދަށް މާލީ ބުރައެއް އުފުލަންޖެހޭތީ ކަންބޮޑުވުން ފާޅުކޮށްފައެވެ. 

ގައުމީ ދަރަންޏާއި ބަޖެޓް ޑެޕޮސިޓް އިތުރުވުން ފަދަ އިގްތިސާދީ ބޮޑެތި ގޮންޖެހުންތަކާ ކުރިމަތިލާން ޖެހިފައިވާ މި ދަނޑިވަޅުގައި، ސަރުކާރުގެ ބޭކާރު ހަރަދުތައް ކުޑަކުރުމަށް ފިޔަވަޅުތަކެއް އެޅުމަކީ ކޮންމެހެން ކުރަންޖެހޭ ކަމެއްކަމަށްވެސް މި ޕެޓިޝަންގައިވެއެވެ.

މިހާރު މަޖިލީހުގެ މެމްބަރުންނަށް މުސާރައިގެ އިތުރުން ބޮޑު އަދަދަކުން ކޮމިޓީ އެލަވަންސް ލިބި މެމްބަރުންގެ ޖުމްލަ އާމްދަނީ ވަރަށް ބޮޑުކަމަށް މި ޕެޓިޝަންގައިވެއެވެ. 
އަދި އާންމު ރައްޔިތުންނަށް ލިބެން ހުންނަ އާސަންދަ ސްކީމަށް ވުރެ މާ ބޮޑު ޕްރިމިއަމް ހެލްތް އިންޝުއަރެންސް ޕެކޭޖެއް މެމްބަރުންނަށް ލިބޭކަމަށްވެސް މި ޕެޓިޝަންގައިވެއެވެ. 

އެވްރެޖް ދިވެއްސަކަށް ދިރިއުޅުމުގެ ހަރަދު ބޮޑުވެ، މާލީ އުނަދަގޫތަކާއި ކުރިމަތިލާން ޖެހިފައިވާ ދަނޑިވަޅެއްގައި، މި ތަފާތުކަމަކީ ބޭއިންސާފު ކަމެއް." އޮންލައިންކޮށް ސޮއިކުރެވޭ ޕެޓިޝަންގައިވެއެވެ. މުސާރަ ކުޑަކުރުމުގެ އިތުރުން ކޮމެޓީ އެލަވަންސް އުވާލުމަށްވެސް މި ޕެޓިޝަންގައި ވަނީ ގޮވާލާފައެވެ. 

މީގެ އިތުރުން ކުރީގެ މެމްބަރުންނަށް އިނާޔަތްތައް ހުއްޓުވަންވެސް މި ޕެޓިޝަންގައި ވަނީ ގޮވާލާފައެވެ.