ދިވެހިރާއްޖޭގެ އިސްލާމީ ޔުނިވަރސިޓީގެ ޖަލްސާކުރާ މާލަމުގައި ރޭ ބޭއްވުނު "މަހުރަޖާނުލް ޤުރުއާނިލްކަރީމް 1446" ޕްރޮގްރާމް ފެށުމުގެ ރަސްމިއްޔާތުގައި ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު ބައިވެރިވެވަޑައިގެންފިއެވެ.

މި ރަސްމިއްޔާތުގައި އިސްލާމީ ޔުނިވަރސިޓީގެ ތިން ދަރިވަރަކާއި، މިޞްރުގެ ޤާރީއެއްގެ ޤުރުއާން ކިޔެވުން ހުށަހަޅައިދެވުނެވެ. އަދި ކިޔެވުނު އާޔަތްތަކާ ގުޅޭގޮތުން ޔުނިވަރސިޓީގެ އިސް ބޭފުޅުން ވާހަކަފުޅު ދެއްކެވިއެވެ.

މި ގޮތުން ޔުނިވަރސިޓީގެ ވައިސް ޗާންސެލަރ ޑޮކްޓަރ ޢަލީ ޒާހިރު އާއި، ކުއްލިއްޔާ އޮފް ޤުރުއާން އެންޑް ސުންނާގެ ލެކްޗަރަރ އައްޝައިޚް ޢަބްދުލްޢަޒީޒު ޙުސައިން އަދި ކުއްލިއްޔާ އޮފް އިސްލާމިކް ރިވީލްޑް ނޮލެޖް އެންޑް ހިއުމަން ސައިންސްގެ ޑީން އައްޝައިޚް ނިމާލް މުޙައްމަދު ވާހަކަފުޅު ދެއްކެވިއެވެ.

ރަސްމިއްޔާތުގައި ފާހަގަކޮށްލެވޭ އެއް ކަމަކީ ރައީސުލްޖުމްހޫރިއްޔާގެ އަނބިކަނބަލުން މި އަހަރުގެ މަހުރަޖާނުގެ ހުށަހަޅުންތެރީންނަށް ހަނދާނީ ލިޔުން ހަވާލުކޮށްދެއްވުމެވެ.

"މަހުރަޖާނުލް ޤުރުއާނިލްކަރީމް" އަކީ 2006 ވަނަ އަހަރުން ފެށިގެން ކޮންމެ ރަމަޟާން މަހަކު ބާއްވަމުން އަންނަ ޚާއްޞަ ޕްރޮގްރާމެކެވެ. މި މަހުރަޖާނުގެ މައިގަނޑު މަޤްޞަދަކީ ރީތި ރާގުތަކަށް ކީރިތި ޤުރުއާން ކިޔަވައި، ޤުރުއާނުގެ ޢިލްމު ފެތުރުމެވެ. މި ޕްރޮގްރާމަކީ ދިވެހިރާއްޖޭގެ އިސްލާމީ ޔުނިވަރސިޓީގެ ކުއްލިއްޔާ އޮފް ޤުރުއާން އެންޑް ސުންނާގެ އިސްނެގުމުގެ މަތިން ކުރިއަށްގެންދާ ޕްރޮގްރާމެކެވެ.