މަގު ހެދުން ފަދަ ތަރައްގީގެ މަޝްރޫއުތައް ހިންގަން ބައެއް ފަހަރު މަގު މެދުގައި ހުންނަ ގަސް ކަނޑަން ޖެހޭ ކަމަށް ތިމާވެއްޓާއި ފަތުރުވެރިކަމުގެ ވަޒީރު ތޯރިގު އިބްރާހީމް ވިދާޅުވެއްޖެ އެވެ. 

މިއަދު މެންދުރުފަހު ބޭއްވި ނޫސްވެރިންގެ ބައްދަލުވުމުގައި ތޯރިގު ވިދާޅުވީ މަގު ހަދާ އިރު މަގު މެދުގައި ގަސް ހުރި ނަމަ، އެ ހާލަތުގައި ގަސް ކެނޑުން ނުވަތަ ގަސް ނަގައި އެހެން ތަނަކަށް ބަދަލުކުރުން ނޫން އިހުތިޔާރެއް ނޯންނާނެ ކަމަށެވެ. 

"ތަރައްގީގެ މަޝްރޫއެއްގައި ހުންނާނެ ގަސް ނަގަން ޖެހޭ ހާލަތު ވެސް. މަގެއްގެ މެދުގައި ގަހެއް ހުރެއްޖެނަމަ އެ ގަސް ނަގަން ޖެހޭ ހާލަތެއް އޮވެއްޖެއްޔާ ގަސް ނަގާނެ،" ތޯރިގު ވިދާޅުވި އެވެ. 

މީގައި ކުރަން ޖެހޭ ކަމަކީ ތިމާވެށްޓަށް ގެއްލުން ވާ މިންވަރު ވީހާ ވެސް ކުޑަވާނެ ގޮތަށް ކުރިއަށް ގެންދިއުން ކަމަށް ވަޒީރު ވިދާޅުވި އެވެ. 

ދެން އޮންނާނެ ކަމަކީ ކަނޑާ ގަސްތަކުގެ ބަދަލުގައި ގިނައިން ގަސް އިންދުން ކަމަށް ވެސް ވަޒީރު ވިދާޅުވި އެވެ. މި ސަރުކާރުން މަސައްކަތްކުރަނީ އެ މަގުން ކަން ވިދާޅުވެ އިޝާރާތް ކުރެއްވީ އެއް މިލިއަން ގަސް އިންދުމުގެ ޕްރޮގްރާމަށެވެ.