ސްޓެލްކޯގެ މެނޭޖިންގް ޑިރެކްޓަރުކަމުގެ މަގާމާއި ހަވާލުވުމަށްފަހު 8.5 މިލިއަން ރުފިޔާއަށް ފްލެޓެއް ގަތްކަމަށްބުނެ، ބައެއް ފަރާތްތަކުން ދައްކާ ވާހަކައަކީ ދޮގު ވާހަކަތަކެއް ކަމަށް ސްޓެލްކޯގެ މެނޭޖިންގް ޑިރެކްޓަރު ހުސެއިން ފަހުމީ ވިދާޅުވެއްޖެއެވެ.

ފަހުމީ ވިދާޅުވީ ބައެއް ފަރާތްތަކުން ދައްކާ ދޮގުވާހަކައިގައި އެ އިޝާރާތްކުރާ ފްލެޓަކީ ކުރީގެ ރައީސް ޔާމީންގެ ވެރިކަމުގައި، އަހަރުތަކެއް ކުރިން   ގަނެ، ފައިސާ ދައްކަމުން އަންނަ ފްލެޓެއްކަމަށެވެ. އަދި އޭނާއޭ ކިޔައިގެން ފަތުރަމުންދާ އަސާސެއްނެތް ދޮގު ވާހަކަތައް ފަތުރަނީ ސިޔާސީ މަގުސަދެއް ހާސިލުކުރުމަށް ކަމަށްވެސް ފަހުމީ ވިދާޅުވެފައިވެއެވެ.

މީގެ އިތުރުން ފަހުމީ ވިދާޅުވީ ސިޔާސީ މަގުސަދެއް ހާސިލް ކުރުމަށް ނަމަވެސް މީހުންގެ އަބުރަށް ހުތުރުވާފަދަ ދޮގު ވާހަކަތައް ވަގުތުން ވަގުތަށް ހުއްޓާލަންޖެހޭ ކަމަށެވެ. 

އިތުރަށް ފަހުމީ ވިދާޅުވީ ސިޔާސީ ގޮތުންނާއި އަދި އެނޫން ގޮތަކުންވެސް ސްޓެލްކޯގެ މެނޭޖިންގް ޑިރެކްޓަރު ކަމުގައި ހުންނަވައިގެން އެފަދަ އަމަލެއް ކުރައްވާފައި ނޯންނާނެކަމަށެވެ.

ސްޓެލްކޯގެ މެނޭޖިންގް ޑިރެކްޓަރުގެ މަގާމުގައި ހުންނަވައިގެން ކުރައްވަމުން ގެންދަވާ ގައުމީ މަސައްކަތާ ގުޅުވައި ދެކެވޭ ބިނާކުރަނިވި ފާޑުކިޔުންތަކަށް އަބަދުވެސް އިޙްތިރާމްކޮށް މަރުހަބާ ކިޔާކަމަށް ފަހުމީ ވިދާޅުވިއެވެ.