މާމެންދޫގެ އިހްތިސާސްގައި ހުޅިމެންދޫ ހިމަނަން ރައީސް ޑރ. މުހައްމަދު މުއިއްޒު ނިންމަވައިފިއެވެ.

އެ މަނިކުފާނު މިގޮތަށް ނިންމަވާފައިވަނީ ރާއްޖޭގެ އިދާރީ ދާއިރާތަކުގައި ހިމެނޭ ސިޓީ ކައުންސިލްތަކާއި ރަށު ކައުންސިލްތަކުގެ އިހްތިސާސް ކަނޑައެޅުމަށް ރައީސްއަށް މަތިކޮށްފައިވާ މަސްއޫލިއްޔަތުގެ ދަށުން މިދިޔަ ހޮނިހިރު ދުވަހު ނެރުއްވި ގަރާރެއްގަ އެވެ.

އެ ގަރާރުގައި ރައީސް ވިދާޅުވީ، ރާއްޖޭގެ އިދާރީ ދާއިރާތަކުގައި ހިމެނޭ ސިޓީ ކައުންސިލްތަކާއި ރަށު ކައުންސިލްތަކުގެ އިހްތިސާސްތައް ކަނޑައަޅުއްވައިފައި އޮތްގޮތަށް ބަދަލު ގެންނަންޖެހޭ ކަމަށް ފެނިވަޑައިގަންނަ ކަމަށެވެ. 

އެހެންކަމުން  ހުވަދު އަތޮޅު އުތުރުބުރި މާމެންދޫގެ އިދާރީ ދާއިރާގެ އިހްތިސާސްތަކަށް ބަދަލު ގެނެސް، މާމެންދޫގެ އިހްތިސާސްތަކުގެ ތެރެއަށް ހުޅިމެންދޫ ހިމަނާފައިވާކަމަށް އެ ގަރާރުގައިވެއެވެ. 

މީގެ އިތުރުންވެސް ކައުންސިލަށް ކަނޑައަޅާފައިވާ އިހްތިސާސްގެ ތެރޭގައި ރިޒޯޓެއް ނުވަތަ އިންޑަސްޓްރިއަލް ރަށެއް ހިމެނޭ ނަމަ އެ ކައުންސިލެއްގެ އިހްތިސާސުން އެ ރިޒޯޓެއް ނުވަތަ އިންޑަސްޓްރިއަލް ރަށެއް ހިމެނޭބައި އުނިވެގެންދާނެކަމަށް ގަރާރުގައިވެއެވެ. އަދި ފަޅުރަށެއްގެ ބައެއް ދެ ކައުންސިލްގެ އިހްތިސާސުގެ ތެރެއަށް ވަންނަ ނަމަ، އެ ފަޅުރަށެއްގެ އިހްތިސާސް އެ ދެ ކައުންސިލްގެ އިހްތިސާސްގެ ތެރެއިން ވަކިވެގެންދާނެކަމަށްވެސް ބުނެފައިވެއެެވެ.  

ހުޅިމެންދޫއަކީ މާމެންދޫއާ އެއް ފަޅެއްގައި އޮންނަ ގާތްގަނޑަކަށް 5.40 ހެކްޓަރުގެ ރަށެކެވެ