މާފަންނު ސަހަރާގައި ބައިބަލާކުޅެން ހެދިތަން މާލެ ސިޓީ ކައުންސިލުން ނަގައިފިއެވެ.

މާލެ ސިޓީ ކައުންސިލްގެ މޭޔަރު އާދަމް އާޒިމް ވިދާޅުވީ، މާފަންނު ސަހަރާގައި ބައިބަލާ ކުޅޭތަނެއް ހެދުމަށް ހުއްދަދީފައި ނުވާނެކަމަށެވެ. އަދި މާފަންނު ސަހަރާގައި ކުޅިވަރު ކުޅޭތަނެއް ހަދައިގެން އުޅެނީ ސިޓީ ކައުންސިލުގެ ހުއްދައާ އެކީ ނޫން ކަމަށެވެ.

ދިވެހި ތާރީހަށް ހިދުމަތްކުރައްވާ ބޭފުޅެއްކަމުގައިވާ ނާޖިހު ދީދީ ވަނީ ބައިބަލާ ކުޅެން ހެދި ތަނުގެ ފޮޓޯތަކެއް އިއްޔެ ސޯސަލްމީޑިއާގައި ހިއްސާކޮށްފައެވެ. ފޮޓޯތަކުން ފެންނަގޮތުގައި ދޮންވެލި އަޅައި ވަށައިގެން ވެލިބަސްތާ ޖަހައި އެތަން ބައިބަލާ ކުޅުމަށް ތައްޔާރުކޮށްފައި އޮތްތަން ފެނެއެވެ.

މި ފޮޓޯތައް ދައުރުވުމާއި ގުޅިގެން އާންމު ރައްޔިތުންގެ ގިނަ ފާޑުކިޔުންތައް ސިޓީ ކައުންސިލަށް އަމާޒުވެ، ރައްޔިތުން ވަނީ މިކަމާމެދު ނުރުހުން ފާޅުކޮށްފައެވެ. އަދި ބައެއް އިލްމުވެރިންވެސް މިކަމާމެދު ފާޑުކިޔާ ނުރުހުން ފާޅުކޮށްފައިވެއެވެ.