ރައީސް ޑރ.މުއިއްޒު އިނގިރޭސިވިލާތުގެ ލިވަޕޫލްގައި އޮތް ރާއްޖޭގެ ފަތުރުވެރިކަމުގެ ކެމްޕެއިން ފައްޓެވުމަށް ބޭއްވި 246ވަނަ މަރސޭސައިޑް ޑަރބީ އަށް ޒިޔާރަތްކުރައްވާ ލިވަޕޫލުގައި ކިޔަވަމުންދާ ކުދިންނާއި އިއްޔެ ބައްދަލުކުރައްވައިފިއެވެ.

ރައީސްވަނީ ލިވަޕޫލަށް ކުރެއްވި ދަތުރުފުޅުގައި ދަރިވަރުންނާޢި ބައްދަލުކޮށް ދަރިވަރުންގެ ތައުލީމީ ކަންކަން ކުރިއަށްދާގޮތާއި، ދަރިވަރުންގެ ތަޖުރިބާތަކާއި ގުޅޭގޮތުން އޮޅުންފިލުވާފައެވެ. އަދި މަތީ ތައުލީމު ހާސިލްކުރަމުންދާ ދަރިވަރުންނަށް ކުރިމަތިވާ ދަތިތަށް އޮޅުންފިލުވާ އެ ދަރިވަރުންނަށް ކުރިމަތިވާ ދަތިތައް ހައްލުކޮށްދެއްވުމަށް ސަރުކާރުން ހާއްސަ ސަމާލުކަމެއް ދެއްވާނެ ކަމުގެ ޔަގީންކަން ދެއްވާފައިވެއެވެ. 

ރައީސް ދަރިވަރުންނާއި ބައްދަލުކުރެއްވުމަށްފަހު ވިދާޅުވެފައިވަނީ އެގޮތަށް ދަރިވަރުންނާއި ބައްދަލުކޮށްލެއްވުމުގެ ފުރުސަތު ލިބިގެން ދިއުމަކީ އެމަނިކުފާނަށް ލިބުނު ވަރަށްބޮޑު ހިތްހަމަޖެހުމެއްކަމަށެވެ. އަދި ރާއްޖޭގެ ދަރިވަރުން އެ ގައުމުގައި މަތީ ތައުލީމު ހާސިލުކުރަމުން ދާކަމީ އެމަނިކުފާނު ވަރަށް އުފާވާ ކަމެއްކަމަށްވެސް ރައީސް ވިދާޅުވެފައިވެއެވެ. މީގެ އިތުރުން އެ ދަރިވަރުން މަތީ ތައުލީމުން ހާސިލްކޮށްފައިވާ ކާމިޔާބީތަކަށް އެމަނިކުފާނު ފަހުރުވެރިވާކަމަށްވެސް ވިދާޅުވިއެވެ. 

ދަރިވަރުންނާއި ދެއްކެވި ވާހަކަފުޅުގައި ގައުމުގެ ތައުލީމީ ދާއިރާއަށް ކުރިމަތިވެފައިވާ ގޮންޖެހުންތަކާއި، އެކަންކަމަށް ސަރުކާރުން އަޅުއްވަމުން ގެންދަވާ ފިޔަވަޅުތަކުގެ މަށްޗަށް ރައީސްގެ ވާހަކަފުޅުގައި އަލިއަޅުއްވާލާފައިވެއެވެ.

މީގެ އިތުރުން ރައީސް ރާއްޖެއިން ބޭރަށް ކުރައްވާ މިފަދަ ދަތުރުފުޅުތަކުގައި ވަޑައިގަންނަވާ ގައުމުތަކުގައި ދިރިއުޅެމުންދާ ދިވެހި ރައްޔިތުންގެ އިތުރުން އެ ގައުމުތަކުގައި ތައުލީމު ހާސިލުކުރާ ދަރިވަރުންނާއި ބައްދަލުކުރެއްވުމަށް ހާއްސަ އިސްކަމެއް ދެއްވައެވެ. އަދި ބައްދަލުވުންތަކުގައި ދިމާވާ ދަތިތަކާއި، ގޮންޖެހުންތައް އޮޅުންފިލުވައި، އެކަމަށް ހައްލުތައް ހޯއްދަވައިދެއްވުމަށްވެސް ހާއްސަ އިސްކަމެއް ދެއްވާކަން ފާހަގަކުރެވެއެވެ.