ދުނިޔޭގެ ފުޓުބޯޅައިގެ ގަދަ އެއް ބާރުކަމަށްވާ ލިވަޕޫލްގެ ފުޓުބޯޅަ އެކަޑެމީއެއް ރާއްޖޭގައި ހުޅުވަން ފުރުސަތު ލިބިއްޖެކަމަށް ރައީސުލްޖުމްހޫރިއްޔާ ޑރ. މިހައްމަދު މުއިއްޒު ވިދާޅުވެއްޖެއެވެ.

"ރައްޔިތުންނާއެކު" ނަމުގައި ރައީސް އޮފީހުން ބާއްވާ ޕޮޑްކާސްޓުގެ ދެވަނަ އެޕިސޯޑުގައި ވާހަކަ ދައްކްވަމުން ރައީސް ވިދާޅުވީ ވިޒިޓް މޯލްޑިވްސްއިން  ރާއްޖޭގެ ފަތުރުވެރިކަން އިޝްތިހާރުކުރުމަށް ލިވަޕޫލްއާއެކު ވެފައިވާ އެއްބަސްވުމުގެ ދަށުން ރާއްޖޭގައި ލިވަޕޫލްގެ އެކެޑެމީއެއް ހުޅުވުމުގެ ފުރުސަތު ލިބޭކަމަށެވެ.

ރައީސް ވިދާޅުވީ ރާއްޖޭގެ އިޝްތިހާރުތައް ލިވަޕޫލްގެ ދަނޑުގައި ދެއްކުމަށް ހަމަޖެހިފަައިވަނީ މިރޭ އިނގިރޭސި ޕްރިމިއާ ލީގުގައި ލިވަޕޫލްއާއި އެވަޓަން ބައްދަލުކުރާ މެޗުގައިކަމަށެވެ.

އެހެންކަމުން އެ މެޗު ބަލައިލުމަށް ލިވަޕޫލުން ރައީސްއަަށް ދައުވަތު ދެއްވައިފައިވާ ދައުވަތު ގަބޫލުކޮށްފައިވާކަމަށް ވެސް ރައީސް ވިދާޅުވިއެވެ.

އެ މެޗު ބަލައިލެއްވުމަށް ރައީސް އިނގިރޭސި ވިލާތަށް ދަތުރުކުރައްވާއިރު، އެ ދަތުރުގައި ކުޅިވަރާ ބޭހޭ ވަޒީރު އަބްދުﷲ ރާފިއު ވަޑައިގަންނަވާނެކަމަށް ވެސް ރައީސް ވިދާޅުވިއެވެ.

އެ ދަތުރުފުޅުގައި ލިވަޕޫލްގެ ފުޓުބޯޅަ އެކަޑެމީ ހުޅުވުމަށް މަޝްވަރާ ކުރައްވާނެކަމަށާއި، އެ ފުރުސަތު ރާއްޖެއަށް ލިބުމަކީ ކުޅިވަރު ކުރިއެރުވުމަށް ލިބޭނެ ބޮޑު ކުރިއެރުމެއްކަމަށް އެމަނިކުފާނު ވިދާޅުވިއެވެ.

ލިވަޕޫލްގެ އެކަޑެމީތައް ވަނީ 22 ގައުމެއްގައި ހުޅުވާފައެވެ. ލިވަޕޫލްގެ އެކަޑެމީ އެޝިއާ ސަރަހައްދުގައި ހިޅުވާފައިވަނީ އިނޑިއާއި، ޗައިނާގެ އިތުރުން ޖަޕާނުގައެވެ.