ލަންކާގައި ދިރިއުޅޭ ދިވެހިންގެ އާބާދީ 8،000 އިން 1،200 އަށް ދަށަށް ގޮސްފައިވާކަން "ސްރީލަންކާ ގާޑިއަން" ނަމަކަށް ކިޔާ ސްރީލަންކާގެ ނޫހަކުން ރިޕޯޓުކޮށްފިއެވެ.

ދިވެހި ސަރުކާރުގެ ރިޕޯޓުތަކާ ހަވާލާދީ "ސްރީލަންކާ ގާޑިއަން" ނޫހުން ބުނެފައިވަނީ ލައްކާގައި މިހާރު އޮތް ސިޔާސަތުތަކުން ދިވެހިންނާއި ދޭތެރޭ އަމަލުކުރާގޮތް ކަމުނުދާތީ، އެ ގައުމުގައި ދިރިއުޅޭ ގިނަ އަދަދެއްގެ ދިވެހިން އިންޑިއާ އަދި މެލޭޝިއާ ފަދަ ގައުމުތަކަށް ދިރިއުޅުން ބަދަލުކޮށްފައިވާކަމަށެވެ.

ސްރީލަންކާގެ ނޫހުން ބުނެފައިވާގޮތުން މައިގަނޑު އެއް ސަބަބެއް ގޮތުގައި ފާޙަގަކުރެވެނީ ލަންކާގެ މިހާރުގެ ސަރުކާރުން ގެންގުޅޭ އުސޫލުތަށް ކަމަށާއި، ސަރުކާރުން ވިސާގެ އުސޫލުތަކަށް ގެނެސްފައިވާ ބަދަލަކީ މީގެ މައިގަނޑު އެއް ސަބަބު ކަމަށެވެ. މިގޮތުން ކުރިން އެއް އަހަރު ދުވަހާ ހަމައަށް ދިވެހިންނަށް މަލްޓިޕަލް އެންޓްރީ ވިސާ ލިބެމުން އައި ނަމަވެސް، މިހާރު އެ މުއްދަތު ހަމަސްދުވަހަށް މަދުކޮށްފައިވާތީ އެއީ ދިވެހިން ސްރީލަންކާއަށް ދާ އަދަދު މަދުވާ ސަބަބެއްގޮތުގައި ފާހަގަކޮށްފައިވެއެވެ. 

އިތުރަށް "ސްރީލަންކާ ގާޑިއަން" ނޫހުން ބުނެފައިވަނީ އެ ގައުމުގެ ސަރުކާރުން މި ގެންނެވި ބަދަލާއި ގުޅިގެން ދިވެހިންނަށް ނުހަނު ބޮޑު ތަކުލީފުތައް ކުރިމަތިވެފައިވާ ކަމަށެވެ. އަދި އެ ގައުމުގެ ސަރުކާރުން އެގޮތަށް އެ ނިންމުން ނިމާފައިވަނީ އޮޅުމަކުން ކަމުގައި ބުނި ނަމަވެސް މިހާތަނަށްވެސް އެކަން ރަނގަޅު ކުރުމަށް އެއްވެސް މަސައްކަތެއް ކޮށްފައި ނުވާކަންވެސް އެ ނޫހުން ފާހަގަކޮށްފައިވެއެވެ.

މީގެ އިތުރުންވެސް ރާއްޖެއަކީ ސަލާމަތީ ގޮތުން ސްރީލަންކާއަށް ނުރައްކާ އޮތް ގައުމެއް ގޮތުގައި ކަނޑައަޅާފައި އޮތުމާއިއެކު ދެ ގައުމުގެ ގުޅުން އިތުރަށް ހީނަރުވެފައިވާކަމަށްވެސް ބުނެފައިވެއެވެ.  އަދި އެ ނޫހުން ބުނެފައިވަނީ 2019ވަނަ އަހަރު ލަންކާގައި ދިން ނުރައްކާތެރި އީސްޓާ ޓެރަރިސްޓް ހަމަލާއަށްފަހު ދިވެހިންގެ އަދަދު މަދުވެފައިވާކަމަށް ފާހަގަވާކަމަށެވެ.

ރާއްޖެ އާއި ސްރީލަންކާ އާއި ދެމެދު އޮތް ގުޅުމަކީ ޒަމާންވީ ގާތް ގުޅުމެކެވެ. މީގެ ކުރީގައި ދިވެހިން ސްރީލަންކާއަށް ދިރިއުޅުން ބަދަލުކުރާ އަދަދު އެހާމެ ގިނައެވެ. ކުދިންނަށް ކިޔަވައިދިނުމާއި އެނޫންވެސް އެހެނިހެން ސަބަބުތަކާއި ހުރެ ދިވެހިން އެންމެ ގިނައިން ގޮސް އުޅުނު ގައުމަކީ ސްރީލަންކާއެވެ. ދެގައުމުގެ ދޭތެރޭ ހީނަރުކަމެއް އައިސް ދިވެހިން ސްރިލަންކާއަށް ދާ އަދަދު މަދުވެފައި މިވަނީ އެ ގައުމުގެ މިހާރު އޮތް ސަރުކާރު އައިފަހުންނެވެ.