ކުރިއަށް އޮތް ހަތަރު ދުވަހު ރާއްޖެ މަތީގައި ދުންފުހުގެ އަސަރު ހުންނާނެ ކަމަށް މޫސުމާ ބެހޭ އިދާރާ (މެޓް) އިން ބުނެފި އެވެ. 

މެޓުން ބުނީ، މިއަދު ރާއްޖޭގެ އުތުރާއި ދެކުނުގެ ހިސާބުތަކަށް ދުންފުހުގެ އަސަރުކުރަމުންދާ ކަމަށެވެ. މޫސުމާ ބެހޭ ރިޕޯޓުތަކުގައި ދުރުފެންނަ މިންވަރު ތިން ކިލޯމީޓަރަށް ވުރެ ދަށުން ރިޕޯޓްކުރަމުންދާ ކަމަށެވެ. 

ކުރިއަށް އޮތް ހަތަރު ދުވަހު ވެސް އިރުއިތުރުން އަންނަ ވަޔާއެކު، ދުންފުހުގެ އަސަރު ރާއްޖެ މަތީގައި ހުންނާނެ ކަމަށް ބެލެވޭ ކަމަށް މެޓުން ބުންޏެވެ. 

އެހެންކަމުން ބޭރުގައި އެކި ހަރަކާތްތަކުގައި އުޅޭ ފަރާތްތަކުން ވެސް ހާއްސަ ސަމާލުކަމެއް ދިނުމަށް މެޓުން އިލްތިމާސް ކުރެ އެވެ. 

މި ފަހަކަށް އައިސް އާންމުކޮށް ކޮންމެ އަހަރަކު ވެސް އިރުވައި މޫސުމުގައި ރާއްޖެއަށް ޖައްވު ތަގައްޔަރުވުމުގެ ސަބަބުން ހޭޒް ނުވަތަ ފުސްކަމުގެ އަސަރު ކުރެ އެވެ.

ރާއްޖޭގެ ޖައްވު ތަގައްޔަރުވާ މައިގަނޑު ސަބަބަކީ އުތުރު އިންޑިއާގެ ސަރަހައްދުތަކުގައި އަންނަ ނުސާފު ވަަޔެވެ.