ކުޅިވަރުގެ 77 މަޝްރޫއެއް ނިންމުމަށް ސަރުކާރުގެ ތިން ކުންފުންޏަކާ ހަވާލުކޮށްފިއެވެ.

މި މަޝްރޫއު ހަވާލުކުރުމުގެ ރަސްމިއްޔާތު ކުރިއަށްގޮސްފައިވަނީ އިއްޔެ ހަވީރު ހ.ބޯޅަގޭގައެވެ. ރަސްމިއްޔާތުގައި ކުޅިވަރާ ބެހޭ ވަޒީރު އަބްދުﷲ ރާފިއު ވަނީ އެއްބަސްވުމުގައި ސޮއިކުރައްވާފައެވެ.

އެ ރަސްމިއްޔތުގައި އެކި ކުންފުނިތަކުގެ އިސްވެރިންގެ އިތުރުން ބައެއް ދާއިރާތަކުގެ ރައްޔިތުންގެ މަޖިލީހުގެ މެމްބަރުން ބައިވެރިވެފައިވެއެވެ. 

ރަސްމިއްޔާތުގައި ވާހަކަދައްކަވަމުން ކުޅިވަރާއި ބެހޭ ވަޒީރު ވިދާޅުވީ މި އަހަރާއި، އަންނަ އަހަރު ސޮއިކުރެވިގެންދިޔަ މަޝްރޫއުތަކުގެ މަސައްކަތްތައް ޓައިމްލައިންއާއި އެއްގޮތަށް ނިންމުމަށް ކުޅިވަރާއި ބެހޭ ވުޒާރާ އާއި، ސަރުކާރުގެ ކުންފުނިތަކާއި، މާލިއްޔަތާއި ބެހޭ ވުޒާރާ އާއި ގުޅިގެން ވަރަށްބޮޑަށް މަސައްކަތް ކުރާނެކަމަށެވެ. އަދި އިއްޔަ ސޮއިކުރެވިގެންދިޔަ މަޝްރޫއުވެސް އެ މުއްދަތުގެ ތެރޭގައި ނިންމާލެވޭނެކަމަށް ވަޒީރު ވިދާޅުވެފައިވެއެވެ. 

މި މަޝްރޫއުގެ ދަށުން ކުޅިވަރު ދަނޑުތަކާއި، އައުޓް ޑޯ ޖިމްތަކާއި، ފިޓްނަސް އެންޑް ރެކްރިއޭޝަން ސެންޓަރުތައް އެޅުމާއި، މަރާމާތުގެ ކުރުމުގެ މަޝްރޫއުތައް ހިމެނޭކަމަށް ކުޅިވަރާ ބެހޭ ވަޒީރު ވިދާޅުވިއެވެ. މީގެ ތެރޭގައި 34 އައުޓް ޑޯ ޖިމަކާއި، 28 ފިޓްނަސް އެންޑް ރެކްރިއޭޝަން ސެންޓަރާއި، 5ފުޓްސްލް ދަނޑާއި، 7 ފުޓްބޯޅަ ދަނޑާއި އަދި 2 ވޮލީ ބޯޅަ ދަނޑެއް އެޅުމުގެ މަޝްރޫއު ހިމެނެއެވެ. މީގެ ތެރެއިން 28 މަޝްރޫއެއް ފެނަކަ އާއި ހަވާލުކޮށްފައިވެއެވެ. އަދި 26 މަޝްރޫއެއް ހަވާލުކޮށްފައިވަނީ އެމްޓީސީއާއެވެ. މީގެ އިތުރުން 23 މަޝްރޫއެއް ހަވާލުކޮށްފައިވަނީ އާރްޑީސީއާއެވެ. މި 77 މަޝްރޫއުގެ ޖުމްލަ އަގަކަށް 204.5މިލިއަން ރުފިޔާ އަރާނެކަމަށް ލަފާކުރެވޭކަމަށް ކުޅިވަރާބެހޭ ވުޒާރާއިން ބުނެފައިވެއެވެ. 

މި ރަސްމިއްޔާތުގައި ބައިވެރިވެ ވަޑައިގެންނެވި މެމްބަރުންގެ ތެރެއިން ކެނދިކުޅުދޫ ދާއިރާގެ މެމްބަރު މުހައްމަދު އަފޫ ހާމިދު އާއި، މަނަދޫ ދާއިރާގެ މެމްބަރު ހުސްނީ މުބާރިކް އާއި، ވެލިދޫ ދާއިރާގެ މެމްބަރު މުހައްމަދު އައްބާސް އާއި، ފުނަދޫ ދާއިރާގެ މެމްބަރު މުހައްމަދު މަމްދޫހު އާއި، ތިމަރަފުށި ދާއިރާގެ މެމްބަރު އަހުމަދު ރިޔާޒް ވާހަކަދައްކަވާފައިވެއެވެ.