ކުށްކުރާ ގްރޫފްތަކުންނާއި މަސްތުވާތަކެތި ވިއްކާ މީހުން، އެކަން ކުރުމަށްޓަކައި ކުޑަކުދިން ބޭނުން ކުރަމުންދާކަން ފާހަގަކުރެވޭ ކަމަށް ދާޚިލީ ވަޒީރު ޢަލީ އިހުސާން ވިދާޅުވެއްޖެއެވެ.

ވަޒީރު އިހުސާން މިހެން ވިދާޅުވީ ދައުލަތުގެ މީޑިއާއިން މިރޭ ގެނެސްދިން "އަހާ" ފޯރަމްގައި ރައްޔިތަކު ފޮނުއްވި ސުވާލަކަށް ޖަވާބުދެއްވަމުންނެވެ.

ވަޒީރު ވިދާޅުވީ، ފަހުން ހެދި ޤާނޫނުތަކުގެ ތެރެއިން ކުޑަކުދިންނަށް ލިބިދޭ ރައްކާތެރިކަން ލިބިދޭތީ ކުށްކުރާ ގްރޫފްތަކުންނާއި މަސްތުވާތަކެތި ވިއްކާ މީހުން، ކުޑަކުދިން ބޭނުން ކުރަމުންދާކަން ފާހަގަވާ ކަމަށެވެ.

"އެހެންވީމަ އަޅުގަނޑުމެން ޚާއްސަ ގޮތެއްގައި ބަލައިގެން، ކުޑަކުދިން ކުށުގެ މާހައުލަށް ވެއްދުމަކީ ވަރަށް ބޮޑު ކުށެއްކަމުގައި މިހާރު ވާނީ ކަނޑައަޅާފަ، އެ ދާއިރާއަށް ޚާއްސަކޮށްގެން މިހާރު ވާނީ ތަމްރީނުތަކެއް ވެސް ފަށާފަ" ދާޚިލީ ވަޒީރު ވިދާޅުވިއެވެ. 

މީގެ އިތުރުން ވަޒީރު ވިދާޅުވީ، ކުޑަކުދިން ކުށުގެ މާހައުލަށް ނެރޭ ފަރާތްތަކާމެދު ޤާނޫނީ ފިޔަވަޅު އެޅޭނެ ޤާނޫނެއް ހެދުމުގެ މަސައްކަތް މިހާރު ކުރަން ފަށާފައިވާ ކަމަށެވެ.