ކުޑަކުދިންގެ ކަރާމާތަށް އުނިކަން ލިބޭފަދަ މައުލޫމާތުތައް އާންމުކޮށް ނުފެތުރުވުމަށް އިޖުތިމާއީ އަދި އާއިލީ ތަރައްގީއާ ބެހޭ ވުޒާރާއިން އެދިއްޖެ އެވެ. 

އެ ވުޒާއިން އާންމުކުރި ބަޔާނެއްގައި ބުނީ، ކުޑަކުދިންގެ ކަރާމާތަށް އުނިކަން ލިބޭފަދަ ޒާތީ މައުލޫމާތެއް އެއްވެސް ފަރާތަކުން އާންމުކޮށްގެން ނުވާނެ ކަމަށާއި ބަޔާންކޮށްފައިވާކަމަށާއި ކުށުގެ ތުހުމަތުވާ ކުދިންނާއި ކުށުގެ ޝިކާރައަކަށްވާ ކުދިން އަދި ކުޑަކުދިންނާ ގުޅުންހުރި އެހެނިހެން މައްސަލަތަކުގައި އެ ކުދިންގެ ނަމާއި ފޮޓޯ އަދި އެޑްރެސް އަދި ތައުލީމް ހާސިލްކުރާ ތަންތަނުގެ މައުލޫމާތު އާންމުކުރުމަކީ ގާނޫނުގައި މަނާކޮށްފައިވާ ކަންކަން ކަމަށެވެ. 

އެހެން ނަމަވެސް ސޯޝަލް މީޑިއާގައި ދައުރުކުރާ ބައެއް ފޮޓޯ އަދި ވީޑިއޯތަކުގެ ސަބަބުން ސީދާ އަދި ނުސީދާ ގޮތުންވެސް އެ ކުދިންނަކީ ކޮންބައެއްކަން އާންމުންގެ ތެރޭގައި އެނގި އެ ކުދިންގެ ކަރާމާތަށް ގެއްލުން ލިބެމުން ދިއުމަކީ ކަންބޮޑުވާ ކަމެއް ކަމަށް އެ ބަޔާނުގައި ބުނެފައިވެއެވެ.

އެ ވުޒާރާއިން ވަނީ މި ސަބަބުތަކަށްޓަކާ ކުޑަކުދިންނާ ގުޅުންހުރި މިފަދަ އެއްވެސް މައުލޫމާތެއް މީޑިއާގައި ދައުރުނުކުރުމަށް އިލްތިމާސްކޮށްފަ އެވެ.