ވ. ކެޔޮދޫގައި ސަރުކާރުން ކުރިއަށްގެންދިޔަ ފެނާއި ނަރުދަމާ ނިޒާމު ޤާއިމުކުރުމުގެ މަޝްރޫޢުގެ މަސައްކަތް ނިންމާލައިފިއެވެ. މި މަޝްރޫޢުގެ ދަށުން ރަށުގައި ވަނީ ޒަމާނީ ފެނާއި ނަރުދަމާގެ ވަސީލަތްތައް ޤާއިމުކޮށްފައެވެ.

އިމާރާތްކުރުމާއި ގެދޮރުވެރިކަމާއި ބިނާއާބެހޭ ވުޒާރާއިން މަޢުލޫމާތު ދެއްވާފައިވާ ގޮތުގައި، މި މަޝްރޫޢުގެ ދަށުން 45 ޓަނުގެ ދެ އާރްއޯ ޕްލާންޓް ވަނީ ޤާއިމުކޮށްފައެވެ. އަދި 345 ޓަނުގެ ބޯފެން ރައްކާކުރާ ދެ ޓޭންކާއި، 960 ޓަނުގެ ވާރޭފެން ރައްކާކުރާ އެއް ޓޭންކް ވަނީ ބަހައްޓާފައެވެ.

ނަރުދަމާ ނިޒާމުގެ ގޮތުގައި ތިން ޕަންޕިން ސްޓޭޝަން ވަނީ ޤާއިމުކޮށްފައެވެ. މީގެ އިތުރުން 4.3 ކިލޯ މީޓަރުގެ ފެނުގެ ވިއުގައަކާއި 3.9 ކިލޯ މީޓަރުގެ ނަރުދަމާ ވިއުގައެއް ވަނީ އަޅާފައެވެ. އަދި މި މަޝްރޫޢުގެ ދަށުން 27 ކިލޯވޮޓުގެ ސޯލާ ޕެނަލްތަކެއްވެސް ވަނީ ހަރުކޮށްފައެވެ.

މި މަޝްރޫޢު ނިމުމާއެކު، ކެޔޮދޫގެ ރައްޔިތުންނަށް ސާފު ބޯފެން ލިބުމުގެ އިތުރުން، ނަރުދަމާގެ ޚިދުމަތްވެސް ލިބިގެންދާނެއެވެ. އަދި ސޯލާ ޕެނަލްތައް ބޭނުންކޮށްގެން ހަކަތަ އުފައްދާ، ތިމާވެށްޓާ ރައްޓެހި ގޮތެއްގައި މި ނިޒާމު ހިންގުމަށް މަގުފަހިވެގެންދާނެއެވެ.

ވުޒާރާއިން ވިދާޅުވީ ކެޔޮދޫގައި ފެނާއި ނަރުދަމާ ނިޒާމު ޤާއިމުކުރުމުގެ މަސައްކަތް ނިންމާލުމަށްފަހު އޮޕަރޭޓަރާ މިހާރު ހަވާލުކޮށްފައިވާ ކަމަށެވެ. އަދި ނިޒާމު ޓެސްޓްކުރުމުގެ ގޮތުން އަގު ނުނަގައި، މިހާރު ޚިދުމަތް ފޯރުކޮށްދެމުންދާކަމަށްވެސް އެ ވުޒާރާއިން ވިދާޅުވެއެވެ.