ކ.ކާށިދުއާއި ހއ.ކެލާ ފަޅުގައި ފަތުރުވެރިކަން ތަރައްގީކުރުމަށް ކަނޑައަޅާފައިވާ ސަރަހައްދުގައި ޓޫރިސްޓު ރިސޯޓެއް ތަރައްގީކޮށް ހިންގާނެ ފަރާތްތައް ހޯދުމަށް ޓޫރިޒަމް މިނިސްޓްރީން ބީލަމަށް ހުޅުވައިލައިފިއެވެ.

ޓޫރިޒަމް މިނިސްޓްރީން ރޭ ކުރި އިއުލާނެއްގައި ބުނީ، ކެލައާއި ކާށިދޫ ފަޅުގައި ރިސޯޓު ތަރައްގީކޮށް ހިންގުމަށް ޝައުގުވެރިކަން ހުރި ފަރާތްތަކަށް ފުރުސަތު ހުޅުވައިލައިފައިވާކަމަށާއި ޝައުގުވެރިކަން ހުރި ފަރާތްތަކުން މި މަހުގެ 15 ވަނަ ދުވަހުގެ 10:00ގައި، އަދި މެއި މަހުގެ ހަވަނަ ދުވަހުގެ 13:00 ގައި އޮންނަ ބައްދަލުވުމުގައި ބައިވެރިވެ ބީލަމަށް ހުށައަޅަންވާނެކަމަށެވެ.

މި ބައްދަލުވުން ކުރިއަށް ދާނީ ޒޫމް މެދުވެރިކޮށް ކަމަށް އެ މިންސްޓްރީން ބުންޏެވެ. މީގެ އިތުރުން މި ބީލަމުގެ މުއްދަތު ހަމަވާނީ ޖޫން މަހުގެ ފަސް ވަނަ ދުވަހުކަމަށްވެސް ބުންޏެވެ. 

ކެލާގެ ފަޅުން 12.19 ހެކްޓަރުގެ ބިމެއް ހިއްކައިގެންނާއި، ހަމަ އެ ފަޅުން އިތުރު 12.19 ހެކްޓަރުގެ ބިމެއް ހިއްކައިގެން ރިސޯޓް ހެދުމުގެ މަޝްރޫއު ނިންމަން ހަމަޖައްސައިފައިވާއިރު، ކާށިދޫ ފަޅުން ހިއްކަން ނިންމާފައިވަނީ ދިހަ ހެކްޓަރުގެ ބިމެއްކަމަށް ޓޫރިޒަމް މިނިސްޓްރީން ބުނެފައިވެއެވެ. 

ރައީސް ޑރ. މުހައްމަދު މުޢިއްޒު މިދިޔަ ބުރާސްފަތި ދުވަހު ކެލާގެ ފަޅުގައި ރިސޯޓް ހެދުމަށްޓަކައި ގަރާރެއް ނެރުއްވާފައިވެއެވެ. އެ ގަރާރުގެ ދަށުން އެ ރަށުގައި ދެ ރިސޯޓް ހެދުމަށް ނިންމާފައިވެއެވެ. އެގޮތުން އެ ރަށުގެ އިހްތިސާސުން 325.5 ހެކްޓަރު އުނިކުރުމަށް ނިންމާފައިވެއެވެ. އެ ނިންމެވުމުގެ ސަބަބުން މިހާރު ކެލާގެ ފަޅުން ވަނީ 13 ޕަސެންޓް އުނިވެފައެވެ. 

ކެލާގެ ފަޅު ހިއްކައި އެ ރަށުގައި ރިސޯޓް ހެދުމަކީ ރައީސް ޑރ. މުއިއްޒުގެ ރިޔާސީ ވައުދުފުޅެކެވެ. ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުންވެސް ކެލާގައި ރިސޯޓެއް ހެދުމުގެ މަސައްކަތް ކޮށްފައިވާއިރު، އެއިރު އެ މަސައްކަތް އޮތީ އަމަލީ ސިފަ ނުޖެހިއެވެ.