ހއ. ކެލާގެ ފަޅުގައި ދެ ރިޒޯޓު ތަރައްގީކުރުމަށް އިހްތިސާސަށް ބަދަލު ގެނައުމަށް ރައީސް ޑރ. މުހައްމަދު މުއިއްޒު ނިންމަވައިފި އެވެ. 

ރައީސް އޮފީހުން ބުނީ، ކެލާގެ ފަޅުތެރޭގައި ރިސޯޓު ތަރައްގީކުރުމަށް،  ޖުމުލަ 325.5 ހެކްޓަރު ކަނޑައެޅުމަށް އެމަނިކުފާނު ނިންމަވާފައިވާކަމަށެވެ. 

ރައީސް މިގޮތަށް ނިންމަވާފައި ވަނީ ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގައިވާ، އެންމެހައި އިދާރީ ދާއިރާތަކުގައި ހިމެނޭ ސިޓީ ކައުންސިލްތަކާއި ރަށު ކައުންސިލްތަކުގެ އިހްތިސާސް ކަނޑައެޅުމަށް ރައީސްއަށް މަތިކޮށްފައިވާ މަސްއޫލިއްޔަތުގެ ދަށުން، އެމަނިކުފާނު މިއަދު ނެރުއްވެވި ގަރާރަކުންނެވެ. 

 ކެލާގެ އިހްތިސާސަށް ގެނައި ބަދަލު ދައްކުވައިދޭ ޗާޓު، މިހާރު ވަނީ ސަރުކާރުގެ ގެޒެޓުގައި ޝާއިއުކޮށްފަ އެވެ. 

ކެލާ ފަޅުތެރޭގައި ދެ ރިސޯޓު ތަރައްގީކުރެއްވުން އިއުލާނުކުރައްވާފައި ވަނި ފެބްރުއަރީ މަހުގެ ތެރޭގައި އެމަނިކުފާނު އެރަށަށް ކުރެއްވި ދަތުރުފުޅުގެ ތެރެއިންނެވެ. މި ރިސޯޓުތައް ތަރައްގީކުރުމުގެ މަޝްރުއޫގެ ޕްލޭނެއް އަދި ސަރުކާރުން ހާމައެއް ނުކުރެ އެވެ. 

ކެލާއަކީ 2400 މީހުންގެ އާބާދީއެެއް އޮންނަ ރަށެކެވެ. އެ ރަށު ފަޅަކީ 2000އެއްހާ ހެކްޓަރުގެ ބޮޑު ފަޅެކެވެ. އެ ރަށުގައި ކަނޑޫފަލަކާއި ޗަސްބިމެއް އޮވެ އެވެ. އެ ރަށުގެ ދިގު ބީޗަކީ މުޅި ދުނިޔެއަށް ވެސް ނަން މަޝްހޫރު ރީތި ބީޗެކެވެ.