މި ރަމަޟާން މަހުގެ ފުރަތަމަ ހަތް ދުވަހާ އަޅާ ބަލާއިރު، ކަރަންޓު ބޭނުންކުރާ މިންވަރު އަދިވެސް އަންނަނީ އިތުރުވަމުން ކަމުގައި ސްޓެލްކޯއިން ބުނެފި އެވެ. 

ސްޓެލްކޯއިން އެކްސްގައި ޕޯސްޓުކުރަމުން ބުނީ، މާލެ އަދި ހުޅުމާލޭގައި، ރޯދަ މަހުގެ ފުރަތަމަ ހަތް ދުވަހާއި ގާތްގަނޑަކަށް އެއް ޕެޓާންއަކަށް ކަރަންޓު ބޭނުން ކޮށްފައިވާކަން ފާހަގަ ކުރެވޭ ކަމަށެވެ. 

ފުރަތަމަ ހަތް ދުވަހެކޭ އެއްގޮތަށް މި ދުވަސްތަކުގައިވެސް އެއްގަޑިތަކެއްގައި ކަރަންޓު ބޭނުން ކުރަމުންދާ މިންވަރުވަނީ މަތިކަމަށާއި، ޖުމްލަކޮށް ދުވާލެއްގެ މައްޗަށް ކަރަންޓު ބޭނުން ކުރަމުންދާ މިންވަރު ފުރަތަމަ ހަތް ދުވަހާއި އަޅާބަލާއިރު ދަނީ އިތުރުވަމުން ކަމަށް ސްޓެލްކޯއިން ބުނެ އެވެ. 

ސްޓެލްކޯއިން އާންމުކޮށްފައިވާ މައުލޫމާތަށް ބަލާއިރު، ރަމަޟާން މަހު ކަރަންޓު ބޭނުންކުރުން އިތުރުވާން ފަށަނީ މެންދުރު ފަހު 13:00 އިން ފޭށިގެންނެވެ. މި ވަގުތުން ފެށިގެން އިތުރުވަމުން ގޮސް، އެންމެ ބާރު ބޮޑު ވަގުތަކަށް ފާހަގަކޮށްފައި ވަނީ ހަވީރު 4:30 އިން ހައެއް ޖެހުމާ ހަމައަށެވެ.

ސްޓެލްކޯއިން ބުނީ ކަރަންޓު އިގްތިސާދު ކުރުމަށް ހާއްސަ ސަމާލުކަމެއް ދިނުމަށް އިލްތިމާސް ކުރާކަމަށެވެ. 

ރަމަޟާން މަހަކީ ކޮންމެ އަހަރަކުވެސް އެންމެ ކަރަންޓު ބިލްތައް ބޮޑުވާ މަހަށް ވާތީ، ސަރުކާރުން ވަނީ މިމަހުގެ ބިލުން ޑިސްކައުންޓު ދިނުމަށް ނިންމާފަ އެވެ. 

ކަރަންޓު ބިލުން ޑިސްކައުންޓު ދިނުމުގައި ބަލާނީ މިދިޔަ އަހަރުގެ ނުވަ މަހަށެވެ. އެ މަސްތަކުގައި ކަރަންޓު ބޭނުންކޮށްފައިވާ މިންވަރަށް ބަލައިޑިސްކައުންޓު ދޭނީ އިތުރުވާ އަދަދަށް ބަލައިގެން ކަމަށް އެ ކުންފުނިން ބުންޏެވެ.

ކަރަންޓް ބިލުގެ އިތުރުން ފެން ބިލުން ވެސް ޑިސްކައުންޓް ދޭނެ ކަމަށް ސަރުކާރުން ވަނީ ބުނެފަ އެވެ.