ރާއްޖެއަށް އެތެރެކުރަން އުޅުނު 3.5 ކިލޯގެ މަސްތުވާތަކެތި ކަސްޓަމްސް އިން އަތުލައިގެންފި އެވެ. 

މިތަކެތި އަތުލައިގެންފައި ވަނީ ކަނޑު މަގުން ރާއްޖެ އެތެރެކުރުމަށް މަސައްކަތް ކުރަމުން ދަނިކޮށް ކަމަށާއި އަތުލައިގަނެވުނު ތަކެތީގެ ތެރޭގައި ތިން ބާވަތެއްގެ މަސްތުވާތަކެތި ހިމެނޭ ކަމަށް ކަސްޓަމްސްއިން ބުންޏެވެ.

އަތުލައިގަތް މަސްތުވާތަކެތީގައި ހިމެނެނީ، 2138 ގްރާމުގެ މެތަމްފެޓަމިންއާއި 1086 ގްރާމުގެ ކެޓަމިން އަދި 310 ގްރާމުގެ ހެރޮއިންއެވެ. 

މި ތަކެތީގެ ޖުމްލަ ބަރުދަނުގައި 3.5 ކިލޯ ހުރި އިރު، މިތަކެތީގެ މަގުމަތީ އަގު 6.7 މިލިއަން ދިވެހި ރުފިޔާއަށް އަރާކަމަށް ކަސްޓަމްސް އިން ބުންޏެވެ.