މިސްކިތްތަކުގެ ޖަމާއަތުގައި ނަމާދުކުރާއިރު، އިމާމުން ފިޤުހުވެރިވުމަކީ މުހިންމުކަމެއް ކަމަށް އިސްލާމީ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

ފޭސްބުކުގައި ކުރެއްވި ޕޯސްޓެއްގައި ވަޒީރު ވިދާޅުވީ ފިޤުހުވެރިވުމަކީ ޝަރުއުގެ ހުކުމްތައް އެވަގުތެއްގެ ހާލަތެއްގެ މައްޗަށް ފައްތައި އަމަލުކުރަން ދަނެގަތުން ކަމަށެވެ. މިގޮތުން މިސްކިތްތަކުގެ އިމާމުން ފިޤުހުވެރިވުމަކީ މުހިންމުކަމެއްކަން ވަޒީރު ފާހަގަކުރެއްވި އެވެ. 

"މިސާލަކަށް 7:00 ޖަހާ އިރު ޢީދު ނަމާދު ފަށާއިރު، 7:00 ތެދުވެ ވަގުތުން ހަށަން ބަނުމުގެ ބަދަލުގައި 7:00 ކުރިން ތެދުވެ 7:00 ވާއިރަށް ބޮޑުވެގެންވާ އެ ޖަމާއަތުގެ ސަފުތައް ތަރުތީބުކޮށްލެވޭނެހައި ވަގުތު އޮތްވައި ތެދުވެ ސަފު ތަރުތީބު ކުރުމަށް ޖާގަ ދެވޭނެ" ވަޒީރު ވިދާޅުވިއެވެ.

ހަމަ މި މަގުން ފަރުޟު ނަމާދު ކުރާނަމަ، ޖަމާއަތް ބޮޑުވި ވަރަކަށް ކިޔެވުން ކުރު ކުރުމާއި، ޖަމާޢަތުގައި ނަމާދު ކުރަމުން ދަނިކޮށް ކުޑަކުދިން ރޯ އަޑު އިވިއްޖެނަމަ ނަމާދު އަވަސް ކުރުމާއި، މިސްކިތް ކައިރީގައި އެހެނިހެން މިސްކިތްތަކާއި މީހުން ދިރިއުޅޭ ގޭގޭ ހުރި ނަމަ ތާޅަ ފިއްޔަށް ނަމާދު ކުރާ އަޑު ނުޖެއްސުމަކީ ރަނގަޅު ގޮތް ކަމުގައި ވަޒީރު ވިދާޅުވި އެވެ.

އެއީ ކައިރި ކައިރީގައި ހުންނަ މިސްކިތްތަކަށް އުނދަގޫވެދާނެތީ އާއި ކައިރި ގޭގޭގައި ނަމާދުކުރަން ތިބޭ އަންހެނުންނާއި ބަލިމީހުންނާއި ނިދާފައި ތިބޭ ކުޑަކުދިންނަށް ދަތިވެދާނެތީ ކަމަށް ވެސް ވިދާޅުވި އެވެ. 

އެހެން ނަމަވެސް އެފަދަ ހާލަތްތަކުގައި ގޮވާ އިރު ތާޅަ ފިއްޔަށް އަޑު ދޭން ޖެހޭނެ ކަމަށާއި އެއީ ނަމާދު ވަގުތު ވަދެއްޖެކަން ގިނަ ބަޔަކަށް އިޢުލާން ކުރުމުގެ ގޮތުން ކަމަށްވެސް ވަޒީރު ވިދާޅުވިއެވެ.