ފުލުހުންގެ ހިދުމަތް މުޅި ރާއްޖެއަށް ފުޅާކުރުމަށް އިތުރު އަށް ރަށެއްގައި ފުލުހުންގެ މަރުކަޒު ހެދުމަށް އެއްބަސްވުމުގައި ސޮއިކޮށްފިއެވެ.

އިސްކަންދަރު ބިލްޑިންގައި މިއަދު ބޭއްވި ރަސްމިއްޔާތުގައި ފުލުހުންގެ ފަރާތުން އެއްބަސްވުމުގައި ސޮއިކުރެއްވީ ކޮމިޝަނަރު އޮފް ޕޮލިސް އަލީ ޝުޖާއުއެވެ. އެ މަޝްރޫއު ހަވާލުކުރި ކުންފުނިތައް ކަމަށްވާ އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ ސީއީއޯ އަދި މެނޭޖިން ޑިރެކްޓަރު ޑެޕިއުޓީ ކޮމިޝަނަރު އޮފް ޕޮލިސް ރިޓަޔާޑް އަހުމަދު ސައީދުއެވެ. އަދި އާރްޑީސީގެ ފަރާތުން އެ ކުންފުނީގެ މެނޭޖިންގް ޑިރެކްޓަރު އަލީ ޒުހައިރެވެ. ފެނަކަ ކޯޕަރޭޝަންގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގް ޑިރެކްޓަރު ރިޓަޔާޑް މުހައްމަދު ނަޖާހުއެވެ. 

ފުލުހުންގެ ހިދުމަތް މުޅި ރާއްޖޭގެ ހުރިހާ ރަށަކަށް ފޯރުކޮށްފިނުމަށްޓަކައި މި މާރިޗުމަހު ސަރުކާރުން ވަނީ މަޝްރޫއެއް ފަށުމަށް އެއްބަސްވުމެއްގައި ސޮއިކުރައްވާފައެވެ. އޭރުގެ އެއްބަސްވުމުގައި ވާގޮތުން 21 ރަށެއްގައި އެމްޓީސީސީން، އާރުޑީސީން 21 ރަށެއްގަައި އަދި ފެނަކައިން 41 ރަށެއްގައި ތަރައްގީކުރުމަށަ ހަމަޖެހިފައިވެއެވެ. މިގޮތުން ޖުމްލަ 83 ރަށެއްގައި ފުލުހުންގެ މަރުކަޒު ގާއިމް ކުރެވިގެން ދާނެގޮތަށް މަޝްރޫއުގައި އެއްބަސްވެގެން ދިޔައެވެ. 

މިއަދު ވެވުނު އެއްބަސްބުމުގެ ތެރެއިން އެމްޓީސީސީން އިތުރު ހަ ރަށުގައި، ފެނަކަ ކޯޕަރޭޝަނުން އިތުރު އެއް ރަށެއްގައި، އަދި އާރްޑީސީގެ ފަރާތުން އިތުރު އެއް ރަށެއްގައި ފުލުހުންގެ މަރުކަޒު އެޅުމަށް އެއްބަސްވެފައިވެއެވެ. 

މީގެ އިތުރުން މި މަޝްރޫއުގެ ދަށުން ތަރައްގީ ކުރެވޭ އިމާރާތްތަކުގެ ތެރޭގައި ފުލުހުންގެ ހިދުމަތް ސަރަހައްދީ ފެންވަރުގައި ފޯރުކޮށްދިނުމަށް ބޭނުންވާ އިމާރާތްތަކާއި، އަތޮޅު ފެންވަރުގައި ފުލުހުންގެ ހިދުމަތް ފޯރުކޮށްދިނުމަށަ ބޭނުންވާ އިމާރާތްތަކާއި، ރަށްރަށުގައި ފުލުހުންގެ ހިދުމަތް އަލަށް ފެށުމާއި ތަރައްގީކުރުމާއި، ޕޮލިސް ސްޓޭޝަންތައް ގާއިމްކުރުމާއި، ޕޮލިސް ޕޯސްޓްތަކާއި، ފުލުހުންގެ އެކޮމޮންޑޭޝަން ބްލޮކްތައް ތަރައްގީކުރުން ހިމެނެއެވެ.