ޣައްޒާ ސްޓްރިޕްގެ ފަލަސްތީނުގެ ރައްޔިތުން މަޖުބޫރުން ނެރުމަށާއި ވެސްޓް ބޭންކްގައި އާބާދީތައް އިތުރުކުރުމަށް އިސްރާއީލުން އަޅަމުންދާ ފިޔަވަޅުތައް ދިވެހި ސަރުކާރުން ހަރުކަށި އިބާރާތުން ކުށްވެރިކޮށްފިއެވެ.

މިގޮތުން، ޣައްޒާ ސްޓްރިޕްގެ ފަލަސްތީނުގެ ރައްޔިތުން މަޖުބޫރުން ނެރުމަށް އޭޖެންސީއެއް ޤާއިމްކުރުމަށް އިސްރާއީލުން ކޮށްފައިވާ އިޢުލާނާއި، ވެސްޓް ބޭންކްގައި ހުރި 13 ޣައިރު ޤާނޫނީ އާބާދީ ވަކިކުރުމުގެ ރޭވުންތަކަކީ ބައިނަލްއަޤްވާމީ ޤާނޫނާއި އދ.ގެ ޤަރާރުތަކުގެ، ޚާއްޞަކޮށް ސެކިއުރިޓީ ކައުންސިލްގެ ޤަރާރު 2334 ގެ ޚިލާފުވުމެއް ކަމުގައި ރާއްޖެއިން ދެކޭ ކަމަށް ފޮރިން މިނިސްޓްރީން ބުނެފައިވެއެވެ.

ފޮރިން މިނިސްޓްރީން ނެރުނު ބަޔާނުގައި ބުނެފައިވަނީ، މަޖުބޫރުން ނެރުމާއި އާބާދީތައް އިތުރުކުރުމަކީ ސުލްހައަށް ކުރެވޭ މަސައްކަތްތަކަށް ހުރަސްއެޅޭ އަދި ފަލަސްތީނު ރައްޔިތުންގެ ޙައްޤުތަކާއި ކަރާމާތަށް ނުރައްކާވާ ކަމެއް ކަމަށެވެ.

އަދި އާންމު ރައްޔިތުން ހިމާޔަތްކޮށް ޣައްޒާގައި ހިނގަމުންދާ އަނިޔާވެރިކަން ހުއްޓުވުމަށް އެހީތެރިވުމަށް ބައިނަލްއަޤްވާމީ މުޖުތަމަޢުން އަވަސް ފިޔަވަޅު އެޅުމަށް ދިވެހިރާއްޖެއިން ގޮވާލާފައިވެއެވެ.

ރާއްޖެއިން ފަލަސްތީނުގެ ރައްޔިތުންނާއެކު ސާބިތުކަމާއެކު ދެމިހުރެ، އިރުމަތީ ޖެރޫސަލަމަކީ ވެރިކަން ކުރާ ރަށްކަމުގައި ބަލައި، 1967 ގެ ކުރީގެ ސަރަހައްދުތަކުގެ މައްޗަށް މިނިވަން ދައުލަތެއް ޤާއިމްކުރުމުގެ ޝަރުޢީ ޙައްޤަށް ތާއީދުކުރާ ކަމަށްވެސް ފޮރިން މިނިސްޓްރީން ބުނެފައިވެއެވެ.