ދިވެހި ގައުމިއްޔަތުގެ މާނަތައް އަލުން ހަރުލަން މަސައްކަތްތަކެއް ކުރަން ޖެހިފައިވާ ކަމަށާއި އިސްލާމް ދީނުން ދިވެހިންގެ ސަގާފަތް އިސްލާހު ކުރެވޭނެ ކަމަށް، ދިވެހި ގައުމިއްޔަތު ދިރުވާ އާލާކުރާ ދުވަހުގެ މުނާސަބަތުގައި ރައީސް ޑރ. މުހައްމަދު މުއިއްޒު ނެރުއްވި ހިތޯބުގައި މިއަދު ވިދާޅުވެއްޖެއެވެ.

އެ މަނިކުފާނު ގައުމިއްޔަތު ސިފަ ކުރައްވާފައި ވަނީ އެއީ ބަޔަކު ތަނެއްގައި ދިރިއުޅޭން ފެށުމުން އެބައެއްގެ ދަރިކޮޅު އިތުރުވެ ފެތުރިގެންދާ ދިއުމުގައި، އެ ބަޔަކު އެތަނެއްގައި ކުރާ ތަޖުރިބާތަކުގެ ގޮތުގައެވެ. އަދި މި ރާއްޖެއަކީ މި ތަނުގައި ބަޔަކު ވަޒަންވެރިވި ތާރީހެއް، ދުވަސްވަރެއް އެނގެން ނެތް ރާއްޖެއެއް ކަމަށެވެ. އެ ކަމުން އެނގެނީ ދިވެހީންގެ ދޮށިކަން ކަމަށާއި، އަސްލުވެހިކަން ކަމަށް ވިދާޅުވިއެވެ.

ދިވެހި ފަސްގަނޑު ހުހަށް އޮތް ޒަމާނެއް ފެންނަން ނެތް ކަމަށާއި، ދިވެހި ކަނޑު ހުރަސްކުރި ކޮންމެ ބަޔަކު ވެސް ދެކެފައިވަނީ ދިވެހީން މި ރަށްތަކުގައި ދިރިއުޅެނިކޮށް ކަމަށް ވިދާޅުވި އެވެ. އެހެންކަމުން ދިވެހި ގައުމިއްޔަތަކީ އެތައް ހާސް އަހަރެއްވީ ދިވެހީންގެ އެކުވި ވިސްނުމިގައި ބިންވަޅު ނެގިފައިވާ ހަގީގަތްތަކެއް ކަމަށްވެސް އެ މަނިކުފާނު ދެކެވަޑައިގަންނަވައެވެ. 

އިތުރަށް އެ މަނިކުފާނި ވިދާޅުވީ މިފަހަރު ޤައުމިއްޔަތު ދިރުވާ އާލާކުރާ ދުވަސް މިއައީ މި ބަރަކާތްތެރި ރަމަޟާން މަހުގެ ތެރޭގައި ކަމަށެވެ. މި ހެޔޮ އިއްތިފާގެއް ކަމަށާއި، މިކަމާއި މެދު ވިސްނާލުން ވަރަށް މުހިންމު ކަމަށް ވިދާޅުވިއެވެ.

"ދިވެހީން ހެޔޮނުބައި ކަނޑައަޅާން ބޭނުންކުރާ މިންގަނޑަކީ މާތްވެގެންވާ އިސްލާމްދީން، ދިވެހީން ދެކެނީ އަދި ގަބޫލުކުރާ ހައްގު ގޮތަކީ ދުނިޔެއާއި އާހިރަތުގެ ބާއްޖަވެރިކަން އޮތީ މާތްވެގެންވާ އިސްލާމްދީނުގައި ކަން،" އަބަދުވެސް ދިވެހިންގެ އަމިއްލަވަންތަކަން އިސްކުރުމަށް ވަކާލާތު ކުރައްވާ ސިޔާސީ ލީޑަރު، ރައީސް މުއިއްޒު ވިދާޅުވިއެވެ.

މީގެ އިތުރުން މިއަދު ދިވެހީންގެ ތެރޭގައި ދިވެހި ގައުމިއްޔަތުގެ މާނަތަށް އަލުން ހަރުލަން ވަނީ މަސައްކަތްތަކެއް ކުރަން ޖެހިފައި ކަމަށާއި، އެކަމަށްޓަކައި މި ޒަމާނުގައި ބޭނުންވަނީ ޢިލްމީ ހަމަތަށް ކަމަށް ވިދާޅުވިއެވެ. ވެރިކަމާ ވަޑައިގެންނެވި ދުވަހުން ފެށިގެން އެ މަނިކުފާނާއި އެމަނިކުފާނުގެ ސަރުކާރު ދެމި އޮތީ އެ ކަމުގައި ކަމަށް ވިދާޅުވިއެވެ.

އިސްލާމް ދީން އުނގަންނައިދިނުން ކުރިއަށް ގެންދާނަމަ ދީން މެދުވެރިކޮށް ދިވެހިންގެ ސަގާފަތް ދާނީ އަބަދުވެސް އިސްލާހުވަމުން ކަމަށް ވެސް ވިދާޅުވި އެވެ. ދިވެހި ގައުމިއްޔަތު ވެސް އިލްމީ ހަމަތަކުގެ މަތިން އުނގަންނައިދެމުން ދާނެ ކަމަށް ވިދާޅުވި އެވެ.

ދިވެހީންގެ ތަޖުރިބާތަކާއި ހުނަރުތައް ފަހަށް ރައްކާކޮށް ތަރިކަތައް ވެސް ޒަމާނީ ޓެކްނޯލޮޖީއާއި އިގުތިސޯދީ ވިސްނުން ޝާމިލުކޮށްގެން ދެމެހެއްޓެމުން ބެލެހެއްޓެމުންދާނެ ކަމަށް ވިދާޅުވި އެވެ.