ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުގައި ޓްރެޒަރީ ބިލުގެ ގޮތުގައި ސްޓޭޓް ބޭންކް އޮފް އިންޑިއާ (އެސްބީއައި) އިން ނެގި 50 މިލިއަން ޑޮލަރުގެ ދަރަނި ދެއްކުމަށް އޮތް މުއްދަތު އިންޑިއާ ސަރުކާރުން އިތުރު އަހަރަކަށް ފަސްކޮށްދީފި އެވެ.

މީގެ ކުރިން ވެސް އަހަރު ދުވަހަކަށް ފަސްކޮށްދީފައިވަނިކޮށް، ރާއްޖޭގައި ހުންނަ އިންޑިއާ ހައި ކޮމިޝަނުން ނެރުނު ބަޔާނެއްގައި ބުނީ، ކުއްލި މާލީ އެހީތެރިކަމެއްގެ ގޮތުގައި ފައިސާ ދެއްކުން އިތުރު އެއް އަހަރަށް އެސްބީއައިން ފަސްކޮށްދިނީ ދިވެހި ސަރުކާރުގެ އެދުމަކަށް ކަމަށެވެ.

އިންޑިއާ ސަރުކާރުން ގެންގުޅޭ، އަވައްޓެރި ގައުމުތައް އިސްކުރުމުގެ ހާރިޖީ ސިޔާސަތުގެ ވާހަކަ "ނެއިބާހުޑް ފަސްޓް ޕޮލިސީ" ގެ ވާހަކަ މި ބަޔާނުގައި ވެސް ފާހަގަކޮށްފައިވެ އެވެ.

ރާއްޖޭގެ ހާރިޖީ ވަޒީރު އަބްދުﷲ ހަލީލު ވަނީ އިންޑިއާއަށް ޝުކުރު އަދާކުރައްވައި އެކްސްގައި ޕޯސްޓެއް ކުރައްވައިފަ އެވެ.

ކުރީގެ އެމްޑީޕީ ސަރުކާރުން މި ގޮތަށް 50 މިލިއަން ޑޮލަރުގެ ތިން ޓްރެޒަރީ ބިލެއް ނެގި އެވެ. އެއިން އެއް ބިލުގެ ފައިސާ މިދިޔަ އަހަރު ދިވެހި ސަރުކާރުން ދައްކާފައި ވެސް ވެ އެވެ.