މަގާމުގެ ނުފޫޒު ބޭނުންކޮށްގެން އިމިގްރޭޝަން މުވައްޒަފުންތަކެއް ބިދޭސީންގެ އަތުން ނާޖާއިޒް މަންފާ ހޯދި މައްސަލައެއް ފުލުހުން ތަހުގީގުކުރަން ފަށައިފި އެވެ. 

ފުލުހުން މިރޭ ނެރުނު ނޫސް ބަޔާނެއްގައި ބުނީ، އިމިގްރޭޝަނުގެ ބައެއް މުވައްޒަފުންތަކެއް މަގާމުގެ ނުފޫޒު ބޭނުންކޮށްގެން ބިދޭސީންގެ އަތުން ނާޖާއިޒް މަންފާ ހޯދި މައްސަލައެއް ބަލަމުން އަންނަ ކަމަށެވެ. 

މި މައްސަލަ ފުލުހުން ބަލަމުން އަންނަ އިރު، އިމިގްރޭޝަން ކޮންޓްރޯލަރު މުހައްމަދު ޝަމްއާން ވަނީ ކުއްލި ގޮތަކަށް މަގާމުން ވަކިކޮށްފަ އެވެ.  

ފުލުހުން ބުނީ، މި މައްސަލާގައި ގެއެއް ބަލައި ފާސްކޮށް ތިން މީހަކު ހައްޔަރުކޮށްފައިވާކަމަށެވެ. 

މައްސަލައިގެ ތަހުގީގު ކުރިއަށްދާ މިންވަރަކުން އިތުރު މައުލޫމާތު ހާމަކުރާނެކަމަށް އެ ހިދުމަތުން ބުނެ އެވެ. 

އިމިގްރޭޝަން މުވައްޒަފުންނާ ގުޅުންހުރި މަގާމުގެ ބޭނުންކޮށްގެން ނާޖާއިޒް މަންފާ ހޯދުމުގެ މައްސަލައެއް ފެންމަތިވެފައިވާއިރު، ގަވާއިދާ ހިލާފަށް އުޅޭ ބިދޭސީން ހުއްޓުވައި އަނބުރާ ގައުމަށް ފޮނުވާލުމަށް އެ އިދާރާއިން ވަނީ ކާމިޔާބު އޮޕަރޭޝަންތަކެއް ކުރިއަށް ގެންގޮސްފަ އެވެ.