ކުރީގެ ކޮންޓްރޯލާ ޖެނެރަލް އޮފް އިމިގްރޭޝަން މުހައްމަދު ޝަމްއާން ވަހީދުގެ އާއިލާގެ މީހެއްގެ ފޯނު ފުލުހުންގެ ބެލުމުގެ ދަށަށް ގެންގޮސްފިއެވެ.

މަގާމުގެ ނުފޫޒު ނަހަމަ ގޮތުގައި ބޭނުންކުރުމުގެ ތުހުމަތުކޮށް ޝަމްއާން އިމިގްރޭޝަނުން ވަކިކޮށް، އިއްޔެ ވަނީ އޭނާ ހައްޔަރުކޮށްފައެވެ. އޭނާގެ ބަންދަށް މިހާރު ވަނީ 15 ދުވަސް ޖަހައިފައެވެ.

ފުލުހުން ވަނީ ޝަމްއާން ހައްޔަރުކުރުމުގެ ކުރިން އޭނާ ދިރިއުޅޭ ގެ ބަލައިފާސްކޮށް، އެ ގެއިން ގިނަ އަދަދެއްގެ އިލެކްޓްރޯނިކް ސާމާނާއި ފައިސާ ގެންގޮސްފައެވެ. ނަމަވެސް އެއީ ކިހާ އަދަދެއް ކަމެއް ފުލުހުން ނުބުނެއެވެ.

ޝަމްއާން ވަކިކުރުމުގެ ކުރިން، ފުލުހުން ވަނީ މިދިޔަ ބުރާސްފަތި ދުވަހު ހިންގި އޮޕަރޭޝަނެއްގައި ތިން މީހަކު ހައްޔަރުކޮށްފައެވެ. އެނގިފައިވާ ގޮތުގައި ހައްޔަރުކުރީ އިމިގްރޭޝަންގެ ތިން އޮފިސަރެކެވެ. އެ އޮފިސަރުންނަށްވެސް ކުރަނީ މަގާމުގެ ނުފޫޒު ނަހަމަ ގޮތުގައި ބޭނުންކޮށް ބިދޭސީ މަސައްކަތްތެރިން އަތުން ނާޖާއިޒް މަންފާ ހޯދަމުންދާ ކަމަށް ތުހުމަތުކުރެވޭ މައްސަލެވެ.

ފުލުހުން މިއަދު ބުނީ، އެ މައްސަލައާ ގުޅިގެން ކޯޓު އަމުރެއްގެ ދަށުން ދެ މީހެއްގެ ފުރުން މަނާކޮށްފައިވާ ކަމަށެވެ. އަދި ޝަމްއާންގެ އާއިލާގެ މެންބަރެއްގެ ފޯނުވެސް ކޯޓު އަމުރެއްގެ ދަށުން އަތުލާފައިވާ ކަމަށްވެސް ބުންޏެވެ. އެނގިފައިވާ ގޮތުގައި އެއީ ޝަމްއާންގެ އަންހެނުންގެ ފޯނެވެ.