އިމިގްރޭޝަންގެ ތެރެއިން މަގާމުގެ ނުފޫޒު ބޭނުންކޮށްގެން ބިދޭސީއެއްގެ ގިނަ އަދަދެއްގެ ފައިސާ ނެގި ކަމަށް ބުނާ މައްސަލާގައި ކުށަށް އިއުތިރާފްވެފައިވާ އިމިގްރޭޝަން އޮފިސަރު މުހައްމަދު އަލްސަން އިސްމާއިލް އިތުރަށް ތަންފީޒުކުރާނެ އަދަބެއް ނެތް ގޮތަށް  ދެ މަހާއި ތިން ދުވަހު ޖަލު ހުކުމެއް މިއަދު އިއްވައިފި އެވެ. 

މި މައްސަލަ އަކީ އިމިގްރޭޝަން ބައެއް މުވައްޒަފުން ގަވާއިދާ ހިލާފު އޮޕަރޭޝަން އެއްގައި ބިދޭސީ މަސައްކަތްތެރިންގެ ބަޔަކު ހައްޔަރު ކުރުމުގެ އިތުރުން އޭގެތެރެއިން އެކެއްގެ އަތުން 530,000 ރުފިޔާ ނެގި މައްސަލައެވެ.

މި މައްސަލައިގައި އަލްސަންގެ އިތުރުން ކުރީގެ ކޮންޓްރޯލާ ޖެނެރަލް ޝަމްއާން ވަހީދާއި އިތުރު ތިން އޮފިސަރަކަށް ވެސް ދައުވާކޮށްފައިވެ އެވެ. 

ކްރިމިނަލް ކޯޓުން މިއަދު ހުކުމް ކުރަނީ ދައުލަތާ އެކު އަލްސަން ހަދާފައިވާ އިއުތިރާފުގެ އެއްބަސްވުމާ އެއްގޮތަށެވެ. 

ކުށުގެ އަސާސީ އަދަބަކީ 9 މަހާއި 18 ދުވަހަށް ޖަލަށް ލުން ކަމަށް ވިޔަސް ދައުލަތުން އެއްބަސްވެފައިވަނީ އެއިން ދެ މަހާއި ތިން ދުވަސް އެކަނި ޖަލު ބަންދުގެ ގޮތުގައި ބޭއްވުމަށެވެ. ބާކީ ބައި ޖުރިމަނާއަށް ބަދަލުކޮށް ޖޫރިމަނާގެ ގޮތުގައި 45,000ރ. އެއް އަހަރު ތެރޭގައި ދައްކާ ގޮތަށެވެ.

މި މައްސަލަގާއި އަލްސަން ބަންދުގައި 2 މަހާއި 3 ދުވަސް  ހޭދަކޮށްފައިވާތީ އެ މުއްދަތު ހުކުމުން އުނިކުރުމުން ތަންފީޒުކުރާނެ އަދަބެއް ނެތެވެ.