ކޮންޓްރޯލާ ޖެނެރަލް އޮފް އިމިގްރޭޝަން މުހައްމަދު ޝަމްއާން ވަހީދު އިއްޔެ މަގާމުން ވަކިކޮށްފި އެވެ.

އިމިގްރޭޝަން ކޮންޓްރޯލަރުގެ މަގާމުން ޝަމްއާން ވަކިކޮށްފައި ވަނީ ކޮން ސަބަބަކާ ހުރެ ކަމެއް އަދި ސަރުކާރުން ހާމައެއް ނުކުރެ އެވެ. އޭނާ މަގާމުން ވަކިކުރިކަން އިތުބާރު ހުރި މަސްދަރަކުން މި ނޫހަށް ވަނީ ކަށަވަރުވެފަ އެވެ.

ޝަމްއާން އިމިގްރޭޝަން ކޮންޓްރޯލަރުގެ މަގާމުގައި ހުންނަވައިގެން ގިނަ މަސައްކަތްތަކެއް ކުރެއްވި އެވެ.  އޭގެ ތެރޭގައި ބިދޭސީންގެ މައްސަލަ ހައްލުކުރުމަށް އިމިގްރޭޝަން އިސްވެ ހިންގަމުން އަންނަ އޮޕަރޭޝަން ފާހަގަކުރެވެ އެވެ. 

ކޮންޓްރޯލަރުގެ މަގާމަށް އައްޔަންކުރެއްވުމުގެ ކުރިން ޝައްމާންވަނީ އިމިގްރޭޝަންގައި 14 އަހަރު ޚިދުމަތްކުރައްވައިފައެވެ. ނަމަވެސް އެމްޑީޕީގެ ސަރުކާރުން ވަނީ އޭނާ އިމިގްރޭޝަންގައި އަދައިކުރައްވަމުން އައި ވަޒީފާއިން އެކަހެރިކޮށްފައެވެ.

މިމަގާމަށް ޝަމްއާން އައްޔަންކުރެވުނު އިރު، އެމްޑީޕީ ސަރުކާރުގައި އޭނާ ވަޒީފާއިން ވަކިކުރި މައްސަލަ ވަޒީފާ ޓްރައިބިއުނަލް އިން ބެލުމަށް ފަހު އޮތީ އަލުން ވަޒީފާ ދޭން އަންގާފަ އެވެ.