މި ރަމަޟާން މަހު އިސްލާމިކް މިނިސްޓްރީން މާލެއާއި އަތޮޅުތެރޭގައި ކުރިއަށްގެންދިޔަ ރަމަޟާން މަހުގެ ރޭތައް އިހްޔާކުރުމުގެ ފޯރަމްތައް ވަރަށް ކާމިޔާބުކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ. 

އިސްލާމިކް މިނިސްޓްރީން ރަމަޟާން މަހު މާލޭގައި އަށް އިހްޔާ ފޯރަމް ކުރިއަށް ގެންދިޔައެވެ. އަދި އަތޮޅުތެރޭގައި ހަތް އިހްޔާ ފޯރަމް ކުރިއަށް ގެންގޮސްފައިވާއިރު، ދަރިވަރުންގެ މެދުގައި ހަ އިހްޔާ ފޯރަަމެއް ބާއްވާފައިވެއެވެ. 

މިނިސްޓަރު ވިދާޅުވީ އެ ހުރިހާ ފޯރަމަކަށްވެސް އާންމުންގެ ބޮޑު ތަރުހީބެއް ލިބިފައިވާ ކަމަށެވެ. 

މި ރަމަޟާން މަހަށް ހާއްސަކޮށް ބޭއްވި އިހްޔާ ފޯރަމްގެ ފަހު ފޯރަމްގައި ވާހަކަ ދައްކަވަމުން މިނިސްޓަރު ޝަހީމް ރޭ ވިދާޅުވީ، މި ފަހަރު އަތޮޅުތެރޭގެ އިހްޔާ ފޯރަމް ބޭއްވުނީ އެކަމަށް އެދި ޕްރޮޕޯސަލް ހުށަހެޅި ރަށްތަކަކުގައި ކަމަށާއި އަތޮޅު އިހްޔާތަކުގެ އިންތިޒާމްތައް ވަރަށް ރަނގަޅުކަމަށެވެ. އަދި ގިނަ އަދަދެއްގެ ރައްޔިތުން ކޮންމެ ރަށެއްގައިވެސް ފޯރަމްތަކުގައި ބައިވެރިވެފައިވާ ކަމަށް މިނިސްޓަރު ވިދާޅުވިއެވެ. 

މިނިސްޓަރު ވިދާޅުވީ، ގިނަ އަދަދެއްގެ މީހުން އިހްޔާ ފޯރަމްތަކަށް އައިސްފައިވުމުން އެނގިގެންދަނީ ރައްޔިތުން އެކަމަށް އޮތް ޝައުގުވެރިކަން ކަމަށެވެ. އަދި އަންނަ އަހަރު ރަމަޟާން މަހު މި އަހަރުގެ ރަމަޟާން މަހަށްވުރެ ގިނަ ފޯރަމްތަކެއް ބޭއްވުމަކީ އަމާޒެއް ކަމަށް ވިދާޅުވިއެވެ. 

މި އަހަރުގެ ރަމަޟާން މަހަށް ބޭއްވުނު އެންމެ ފަހު އިހްޔާ ފޯރަމްގައި ރޭ ތަގްރީރް ކުރެއްވީ ޑރ. އަލީ ޒާހިރެވެ. އޭނާގެ ވާހަކަގައި ދަރިންނަށް މި މުޖްތަމައުން އެންމެބޮޑު ހެވެއްކުރާނެ ކަމަކީ އިސްލާމީ ނިޒާމެއްގެ މަތީގައި ތައުލީމު ބިނާކުރެވިގެން ދިއުން ކަމަށާއި ރާއްޖޭގައި އިސްލާމީ ސްކޫލުތައް ގިނަ ވާންޖެހޭ ކަމަށް ގަބޫލުކުރައްވާކަމަށް ވިދާޅުވިއެވެ.