އިންދިރާ ގާންދީ މެމޯރިއަލް ހޮސްޕިޓަލް (އައި.ޖީ.އެމް.އެޗް) އިން މިއަދުން ފެށިގެން ދުވަސް ނުފުރާ ވިހާ ކުދިންނަށް ރެޓީނާ ލޭޒަރ ޓްރީޓްމަންޓްގެ ޚިދުމަތް ދޭން ފަށައިފިއެވެ. މިއީ ދުވަސް ނުފުރާ ވިހާ ކުދިންގެ ލޮލުގެ ފެނުމުގެ ބާރު ރައްކާތެރިކުރުމަށް ދެވޭ ޚާއްޞަ ފަރުވާއެކެވެ.

މި ޚިދުމަތް ރާއްޖޭގައި ފެށުމާއެކު، ދުވަސް ނުފުރާ ވިހާ ކުދިންނަށް ބޭނުންވާ މުހިންމު ފަރުވާ ލަސްނުވެ ލިބުމުގެ ފުރުޞަތު ވަނީ ފަހިވެފައެވެ. މީގެ ކުރިން މިފަދަ ފަރުވާއެއް ހޯދުމަށް ރާއްޖެއިން ބޭރަށް ދާންޖެހުމަކީ ބެލެނިވެރިންނަށް ދިމާވެފައިވާ ބޮޑު ގޮންޖެހުމެކެވެ.

އައި.ޖީ.އެމް.އެޗްގެ އޮފްތަލްމޮލޮޖީ ޑިޕާޓްމަންޓުގެ ޑޮކްޓަރުންނާއި ނަރުހުން މި ޚިދުމަތް ފޯރުކޮށްދިނުމަށް ވަނީ ޚާއްޞަ ތަމްރީނުތަކެއް ފުރިހަމަކޮށްފައެވެ. މި ޚިދުމަތް ފެށުމާއެކު، ދުވަސް ނުފުރާ ވިހާ ކުދިންގެ ލޮލުގެ ދުޅަހެޔޮކަން ކަށަވަރުކުރުމަށް އިތުރު ފިޔަވަޅެއް އެޅިގެން ދިޔައެވެ.

ރެޓީނާ ފޭޒަރ ޓްރީޓްމަންޓަކީ ދުވަސް ނުފުރާ ވިހާ ކުދިންގެ ލޮލުގެ ރެޓީނާގެ ދުޅަހެޔޮކަން ރައްކާތެރިކޮށް، ފެނުމުގެ ބާރު ގެއްލުމުން ސަލާމަތްކުރުމަށް ދެވޭ ފަރުވާއެކެވެ. މި ފަރުވާ ވަގުތުން ލިބެން ފެށުމަކީ ކުދިންގެ މުސްތަޤުބަލަށް ވަރަށް މުހިންމު ކަމެކެވެ.