ހުޅުމާލެ ހޮސްޕިޓަލުގައި ތަރައްގީ ކުރި 14 އެނދުގެ އައު އެމަޖެންސީ ރޫމް ރައީސް މުހައްމަދު މުއިއްޒު މިއަދު ހުޅުވައި ދެއްވައިފި އެވެ.

މި އެމަޖެންސީ ރޫމަކީ ޒަމާނީ ވަސީލަތްތަކާ އެކު ތަރައްގީ ކޮށްފައިވާ ތަނެކެވެ.

ހުޅުމާލޭ ހޮސްޕިޓަލުގައި 14 އެނދުގެ އައު އެމަޖެންސީ ރޫމެއް ތަރައްގީ ކުރުމުގެ އަމަލީ މަސައްކަތް ފަށާފައި ވަނީ މިދިޔަ އަހަރުގެ ޑިސެމްބަރު މަހުގެ 8 ވަނަ ދުވަހު ގައެވެ. މި މަޝްރޫއު ނިމުމާއެކު ހުޅުމާލެ ހޮސްޕިޓަލުގެ އެމަޖެންސީ ރޫމްތަކުގެ އަދަދު މިވަނީ ދެގުނަ ވެގެން ގޮސްފަ އެވެ.

އަލަށް ތަރައްގީ ކުރި މި އެމަޖެންސީ ރޫމް ފަރުމާކޮށްފައި ވަނީ ކްރިޓިކަލް ބަލިމީހުންނަށް ހާއްސަ ފަރުވާ ދިނުމަށް ރިސަސިޓޭޝަން ކޮޓަރިއެއް ވެސް ހިމެނޭ ގޮތަށެވެ. އަދި ފުރާނައަށް ނުރައްކާވާ ހާލަތްތަކުގައި އަވަސް ފަރުވާ ދިނުމަށް އެންމެ ފުރިހަމަ އާލާތްތައް ވެސް މި ތަނުގައި ތައްޔާރު ކޮށްފައި ވެއެވެ.

މާލެ ގްރޫޕް އޮފް ހޮސްޕިޓަލުން ބުނީ މި އެމަޖެންސީ ރޫމުގެ ސަބަބުން އެކްސިޑެންޓްތަކާއި ކުއްލި ފަރުވާ ބޭނުންވާ ކޮންމެ ހާލަތެއްގައި އެ ހޮސްޕިޓަލުން ވަގުތުން ރަނގަޅު ފަރުވާ ލިބެން ފަށާނެ ކަމަށެވެ.