އިއްޔެ އޮޑި ސްޕޯޓްސް އާއި ޓީސީ ބައްދަލުކުރި މެޗުގައި އޮޑި ސްޕޯޓް ކުލަބުގެ ކެޕްޓަން މުހައްމަދު ރަޝީދު (ހޮކޭ) ފިޓު ޖެހިގެން ބިންމައްޗަށް ވެއްޓުނެވެ. ބިން މައްޗަށް އޭނާ ވެއްޓުމާއެކު ދަނޑުމަތީގައި ފަރުވާ ދިނުމަށް ފަހު އޭޑީކޭ ހޮސްޕިޓަލަށް ގެންގޮސް މިހާރު ދަނީ ފަރުވާދެމުންނެވެ. 

ހޮކޭ ދަނޑުމައްޗަށް ވެއްޓުމާއެކު މެޗުގެ ވާދަވެރިކަން އެއްފަރާތް ކޮށްލުމަށް ފަހު އެވަގުތު އެތަނުގައި ތިބި ހުރިހާ ޓީމުތަކުން ބެލީ ހޮކޭ އަށް ފަރުވާދެވޭތޯ އެވެ. އޮޑި ސްޕޯޓްސް ކްލަބުގެ ސެކެރެޓަރީ ޖެނެރަލް އަލީ ޝިފާޒް ވަނީ ފޭސްބުކް ގައި ކުރި ޕޯސްޓެއްގައި އެކަން ފާހަގަކޮށް އެ ދަނޑިވަޅުގައި ކްލަބުތަކުން ދެއްކި ފުޓްބޯޅައިގެ ރީތި ނަމުނާ ފާހަގަކޮށްފަ އެވެ. 

ޝިފާޒު ހިއްސާކޮށްފައިވާ ފޮޓޯގައި ފެންނަނީ ހޮކޭ ސްޓެރެޗަރަށް ލައިގެން މެޑިކަލް ޓީމުން ގެންދާ ތަނެވެ. ހޮކޭ ސްޓެރަޗަރަށް އަރުވައިގެން ގެންދާ ފޮޓޯއިން ފެންނަނީ އޮޑި ސްޕޯޓްސް ކްލަބުގެ މެޑިކަލް ޓީމުގެ އޮފިޝަލުން އެކަންޏެއް ނޫނެވެ. ޓީސީ ސްޕޯޓްސް ކްލަބުގެ މެޑިކް ޝަރަފު އާއި މާޒިޔާ ސްޕޯޓްސް ކްލަބުގެ ޑޮކްޓަރު ހިޝާމް ޒަކީވެސް ހޮކީ ހޮސްޕިޓަލަށް ގެންދިޔުމުގައި އެހީތެރިވި އެވެ. 

''މި އެންމެންވެސް މަސައްކަތްކުރީ ހޮކޭ އަށް އަވަސް ފަރުވާދެވޭތޯ، ފުޓް ބޯޅަ އަކީ ހަމައެކަނި ގޭމެއް ނޫން، އެންމެ އެކަތިގަނޑަކަށްވާ އެއްޗަކީވެސް ފުޓްބޯޅަ'' ޝިފާޒުގެ ޕޯސްޓުގައި ބުންޏެވެ. 

އެނގިފައިވާ ގޮތުން ހޮކޭގެ ހާލު މިހާރު އަންނަނީ ރަނގަޅުވަމުންނެވެ. އަދި އޭނަ މިހާރު ބާއްވާފައި އޮތީ އޮބްޒަވޭޝަންގައި އެވެ.

މީގެ ކުރިން ގިނަ ކްލަބްތަކަކަށް ކުޅެފައިވާ ހޮކޭ ފުރަތަމަ ޑިވިޝަނުގެ ފުޓްބޯޅައިން ރިޓަޔާކުރުމަށް އެނބުރި އައީ މި ސީޒަނުގަ އެވެ.