ގދ. ހޯޑެއްދޫގެ އިހުތިސާސުން "ކަޑެވާރެހާ" ވަކިކޮށްފި އެވެ.

ރައީސް އޮފީހުން ބުނި ގޮތުގައި ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅާ އެއްގޮތަށް އެއްގޮތަށް، އިންޓަގްރޭޓަޑް ޓޫރިޒަމަށް ގދ. ކަޑެވާރެހާ ތަރައްގީކުރުމަށް އެ އަތޮޅު ހޯނޑެއްދޫގެ އިހުތިސާސުން އެ ރަށް ވަކިކޮށް، ހޯނޑެއްދޫގެ އިހުތިސާސަށް ބަދަލު ގެނެސްފައިވާ ކަމަށެވެ. 

އެ ބަދަލު ރައީސް ގެންނެވީ، ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ 56-1 ވަނަ މާއްދާގެ (ހ) އިން ރާއްޖޭގެ އެންމެހައި އިދާރީ ދާއިރާތަކުގައި ހިމެނޭ ސިޓީ ކައުންސިލްތަކާއި ރަށު ކައުންސިލްތަކުގެ އިހްތިސާސް ކަނޑައެޅުމަށް ރައީސަށް މަތިކޮށްފައިވާ މަސްއޫލިއްޔަތުގެ ދަށުން މިއަދު ނެރުއްވި ގަރާރަކުންނެވެ.

އެ ގަރާރާއެކު ގެނެސްފައިވާ ބަދަލު ދައްކުވައިދޭ ޗާޓު ގެޒެޓުގައި މިހާރު ވަނީ ޝާއިއުވެސްކޮށްފައެވެ. 

އެ ގަރާރުގައިވާ ގޮތުން  ކައުންސިލަށް ކަނޑައަޅާފައިވާ އިހްތިސާސްގެ ތެރޭގައި ރިސޯޓެއް ނުވަތަ އިންޑަސްޓްރިއަލް ރަށެއް ހިމެނޭ ނަމަ އެ ކައުންސިލެއްގެ އިހްތިސާސުން އެ ރިސޯޓެއް ނުވަތަ އިންޑަސްޓްރިއަލް ރަށެއް ހިމެނޭބައި އުނިވެގެންދާނެއެވެ. އަދި ފަޅުރަށެއްގެ ބައެއް ދެ ކައުންސިލްގެ އިހްތިސާސުގެ ތެރެއަށް ވަންނަ ނަމަ، އެ ފަޅު ރަށެއްގެ އިހްތިސާސް އެ ދެ ކައުންސިލްގެ އިހްތިސާސްގެ ތެރެއިން ވަކިވެގެންދާނެކަމަށްވެސް ބުނެފައިވެއެެވެ.