ހިޔާވެހި ފައިނޭންސް ސްކީމުގެ ތެރެއިން މިހާތަނަށް 989 މިލިއަން ރުފިޔާގެ ލޯނު އެޕްރޫވްކޮށްފައިވާ ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބް ރޭ ވިދާޅުވެއްޖެ އެވެ.

ރޭ ޕީއެސްއެމްގެ ރާއްޖެ މިއަދު ޕްރޮގްރާމުގައި މިނިސްޓަރު ވިދާޅުވީ، ހިޔާވެހި ލޯނު ދޫކުރަނީ އިކުއިޓީއަށް ދައްކަން ޖެހޭ އަދަދު ކުޑަކޮށްދީގެން ކަމަށާއި، އެގޮތުން މިހާތަނަށް 989 މިލިއަން ރުފިޔާގެ ލޯނު އެޕްރޫވްކުރެވިފައިވާ ކަމަށެވެ.

އެ ލޯނުތަކުގެ ލިޔެކިޔުންތައް ނިމެމުންދާ ވަރަކުން ބޭންކް އޮފް މޯލްޑިވްސް (ބީއެމްއެލް)އިން ލޯނުތައް ދޫކުރަމުންދާނެ ކަމަށާއި، އެ ލޯނު ދޫކުރާ މީހެއްގެ, ބީއެމްއެލުން ކަނޑައަޅާ ޝަރުތުތައް ހަމަވާން ޖެހޭނެ ކަމަށް މިނިސްޓަރު ވިދާޅުވި އެވެ. 

ހިޔާވެހި ފައިނޭންސިންއަށް އެދި ހުށަހަޅާފައިވާ ފަރާތްތަކުން ގެދޮރުވެރިން ޕޯޓަލް މެދުވެރިކޮށް އެޕްލިކޭޝަން ސްޓޭޓަސް ބަލައިލެވޭނެ އިންތިޒާމު މިހާރު ވަނީ ހަމަޖައްސާފަ އެވެ.

ހިޔާވެހި ފައިނޭންސިން އަކީ މާލެއާއި އަތޮޅުތަކުގައި ގެދޮރު އެޅުމަށް ދަތިވެފައިވާ މީހުންނަށް މާލީ އެހީތެރިކަން ފޯރުކޮށްދިނުމަށް ސަރުކާރުން ކުރިއަށްގެންދާ ހާއްސަ ސްކީމެކެވެ. މި ސްކީމަކީ ރާއްޖޭގެ 3 ބޭންކަކާއި ގުޅިގެން އިސްލާމީ އުސޫލުން %5 ފައިދާގައި ކުރިއަށްގެންދާ ފައިނޭންސިން ޕްރޮގްރާމެކެވެ. އަދި ފައިނޭންސް އަނބުރާ ދެއްކުމަށް 25 އަހަރުގެ މުއްދަތެއް ލިބެއެވެ.