ހައިކޯޓުގެ އިސް ފަނޑިޔާރުކަމުގެ މަގާމަށް ކުރިމަތިލާން ޖުޑީޝަލް ސާވިސް ކޮމިޝަން (ޖޭއެސްސީ)ން ހުޅުވާލައިފި އެެވެ. 

މި މަގާމަށް ކުރިމަތިލާން ހުޅުވާލާފައި ވަނީ އެ ކޯޓުގެ އިސް ފަނޑިޔާރުކަމުގައި ހުންނެވި ހުސައިން ޝާހިދު ސުޕްރީމް ކޯޓުގެ ފަނޑިޔާރުކަމަށް އައްޔަންކުރެއްވުމާ ގުޅިގެންނެވެ. 

ޖޭއެސްސީން ކުރި އިއުލާނުގައި ބުނީ، މި މަގާމަށް ކުރިމަތިލެވޭނީ މިހާރުވެސް ހައިކޯޓުގެ ފަނޑިޔާރުކަމުގައި ތިއްބެވި ބޭފުޅުންނަށް ކަމަށެވެ. 

ހައިކޯޓުގެ އިސްފަނޑިޔާރަށް އަސާސީ މުސާރައިގެ ގޮތުގައި 47,700 ރުފިޔާ ލިބިވަޑައިގަންނަވާނެ އެވެ. އަދި ލިވިން އެލަވަންސްގެ ގޮތުގައި 18000 ރުފިޔާ، ރިސްކް އެލަވަންސްގެ ގޮތުގައި 3،300 ރުފިޔާ ލިބިވަޑައިގަނަންނަވާނެ އެވެ. މީގެ އިތުރުން ހެލްތު އިންޝުއަރެންސް އަދި ފޯން އެލަވަންސް، ރައްޔިތުންގެ މަޖިލީހުން ކަނޑައަޅާ ގޮތެއްގެ މަތިން ލިބިވަޑައިގަންނަވާނެ އެވެ. 

މި މަގާމަށް ކުރިމަތިލުމުގެ ސުންގަނޑި އަކީ މިމަހުގެ 29ވާ ހޮނިހިރު ދުވަހުގެ 12:00 އެވެ. 

އެ ކޯޓުގެ ހިންގުން ވަގުތީ ގޮތުން މިހާރު ހަވާލުކޮށްފައިވަނީ ފަނޑިޔާރު މުހައްމަދު ފައިސަލްއާއެވެ.

ސުޕްރީމް ކޯޓު ފަނޑިޔާރު ކަމަށް ޝަހީދު އައްޔަންކުރީ، އެ ކޯޓުގެ ފަނޑިޔާރު ކަމުން ހުސްނުއްސުއޫދު އިސްތިއުފާ ދެއްވުމުންނެވެ.

ސުއޫދު އޭރު ހުންނެވީ ސަސްޕެންޑްކޮށްފަ އެވެ. މިހާރު ވެސް ސުޕްރީމް ކޯޓްގެ ފަނޑިޔާރު މަހާޒު އަލީ ޒާހިރާއި ފަނޑިޔާރު ޑރ. އަޒްމިރަލްދާ ޒާހިރު ސަސްޕެންޑްކޮށްފައިވެ އެވެ. އެ ފަނޑިޔާރުންގެ މައްސަލަތަކެއް ޖުޑީޝަލް ސާވިސް ކޮމިޝަނުން ދަނީ ބަލަމުންނެވެ.