އިންސާނީ ހައްގުތަކާއި ހެޔޮވެރިކަމާއި ދެމެހެއްޓެނިވި ތަރައްގީގެ މަގުގައި ސާބިތުވެ ހުންނަވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ކޮމަންވެލްތު ދުވަހާ ގުޅިގެން ރައީސް ފޮނުއްވި މެސެޖުގައި ވިދާޅުވީ، ކޮމަންވެލްތުގެ ޗާޓަރުން ލާޒިމުކުރާ ޑިމޮކްރަސީގެ އަސާސްތަކުގައި ސާބިތުވެ ހުންނަވާނެ ކަމަށެވެ. އެގޮތުން ކޮމަންވެލްތު ޗާޓަރުން ލާޒިމުކުރާ ޑިމޮކްރަސީގެ އަސާސްތައް ކަމުގައިވާ އިންސާނީ ހައްގުތަކާއި ހެޔޮ ވެރިކަމާއި ދެމެހެއްޓެނިވި ތަރައްގީގެ މަގުގައި ސާބިތުވެ ހުންނަވާނޭ ކަމުގެ ޔަގީންކަން ރައީސް ވަނީ ދެއްވާފައެވެ. 

ރައީސް ވަނީ، ނާއިންސާފުގެ ހިޔަނި ދުނިޔެއަށް އެޅިފައިވާކަން ފާހަގަކުރައްވައި، މި ފަދަ އުނދަގޫ ވަގުތެއްގައި ސަލާމަތްކަމާއި ކުރިއެރުން ހޯދުމަށްޓަކައި، މުޅި ކޮމަންވެލްތުން ބައިވެރިވެގެން ހިންގާ ހަރަކާތުގެ ބުރަދަން ދެނެ ތިބެ، އެއްބައެއްގެ ގޮތުގައި ދެމި ތިބުމަށް ގޮވާލައްވާފައެވެ.

ރައީސްގެ މެސެޖުގައި ވަނީ، ރާއްޖެ ފަދަ ކުދި ދައުލަތްތަކު ހައްގުގައި އަޑުއުފުލައި، މޫސުމީ ވިލުންތެރިކަމާއި މާލީ ވަސީލަތްތަކަށް ފުރުސަތު ފަހިކުރުމާއި އަންހެނުންނާއި ޒުވާނުން ބާރުވެރިކުރުން ފަދަ، ހާއްސަކޮށް ކުދި ދައުލަތްތަކުގެ މަސްލަހަތު ހުރި ކަންކަމުގައި ކޮމަންވެލްތުން ކުރާ މަސައްކަތުގެ އަގުވަޒަންކުރައްވާކަމަށް ވިދާޅުވިއެވެ.

ރައީސްގެ މެސެޖުގައި އިތުރަށް ވިދާޅުވީ، ކޮމަންވެލްތުގެ ކޮންމެ ފަރުދެއްގެ ކުރިއެރުން ކަށަވަރުކުރުމަށްޓަކައި، ކޮމަންވެލްތާއި މެންބަރު ގައުމުތަކާއެކު އޮތް ގުޅުން ހަރުދަނާކުރުމަށް ރާއްޖެއިން ތައްޔާރަށް އޮތްކަމަށެވެ. 

މި އަހަރުގެ ކޮމަންވެލްތު ދުވަހުގެ ޝިއާރަކީ "ޓުގެދާ ވީ ތްރައިވް" އެވެ.