ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ)އިން ހުޅުމާލޭގައި "އަވައްޓެރި ރޯދަވީއްލުން" މި ނަމުގައި ހަރަކާތެއް ބާއްވަން ނިންމައިފި އެވެ. 

މި ހަރަކާތް ކުރިއަށް ގެންދިއުމަށް ނިންމާފައި ވަނީ އެޗްޑީސީ އަދި ހުޅުމާލޭގެ ނެއިބާހުޑް ޕޮލިހުން ގުޅިގެންނެވެ. މި ހަރަކާތުގެ މަގުސަދަކީ ދިވެހިންގެ މެދުގައި ޒަމާނުއްސުރެ އޮންނަ އެކުވެރިކަމާއި އެއްބައިވަންތަކަން އާލާކޮށް ދިރުވުން ކަމަށް އެޗްޑީސީން ބުންޏެވެ.

މި ރޯދަވީއްލުންތައް ބާއްވަން ނިންމާފައި ވަނީ ހުޅުމާލޭގެ އެކި ސަރަަހައްދުތައް ބަހާލައިގެން އެކި ދުވަސްތަކުގެ މަތިންނެވެ. މި އަހަރުގެ ފުރަތަމަ ރޯދަ ވީއްލުން ބޭއްވުމަށް ހަމަޖެހިފައިވަނީ އަންނަ ހޮނިހިރު ދުވަހު، ހުޅުމާލޭ ފޭސް އެކެއްގެ ހުރަވީ ސްކޫލު ކުރިމަތީގައި އޮންނަ، 'ރަނައުރާ މަގު'ގައި ކަމަށް އެޗްޑީސީން ބުންޏެވެ،

"ހުޅުމާލޭގެ ރައްޔިތުންނަކީ އަބަދުވެސް ރައްޔިތުންނާ ގުޅުންހުރި މިފަދަ ކަންކަމުގައި އަޅުގަނޑުމެންނަށް އެއްބާރުލުން ދޭ ބައެއް. އެގޮތުން މިފަހަރުވެސް މި އަވައްޓެރި ރޯދަވީއްލުމުގެ ހަރަކާތް ކުރިއަށް މިގެންދަނީ ގިނަ ބައެއް ބައިވެރިވުމާއި އެއްބާރުލުމާއެކު،" އެޗްޑީސީގެ ހެޑް އޮފް މާކެޓިންގް އެންޑް ޕީއާރު ޑިޕާޓްމަންޓް ހަސަން ޝަހީދު ވިދާޅުވި އެވެ. 

އެޗްޑީސީން ބުނީ، އެ ކުންފުނީގެ އަމާޒަކީ، ކުރިއަށް އޮތް ތަނުގައިވެސް މިފަދަ ހަރަކާތްތައް ރާވައިގެން ކުރިއަށް ގެންދިއުން ކަމުގައެވެ.