މަގާމުގެ ނާޖާއިޒް ފައިދާ ހިފައި ބިދޭސީއެއްގެ އަތުން ގިނަ އަދަދަަކަށް ފައިސާ ހޯދި މައްސަލާގައި ހައްޔަރުކޮށްފައިވާ އިމިގްރޭޝަން މުވައްޒަފުންގެ ވަނަވަރު އާންމުކޮށްފި އެވެ. 

ހަތަރު އިމިގްރޭޝަން އޮފިސަރަކު ހައްޔަރުކޮށްފައިވާއިރު، އިމިގްރޭޝަން ކޮންޓްރޯލަރުގެ މަގާމުގައި ހުންނެވި މުހައްމަދު ޝަމްއާން ވެސް ވަނީ ހައްޔަރުކޮށްފަ އެވެ. 

މި މައްސަލައިގައި ބުރާސްފަތި ދުވަހުގެ ރޭ ހައްޔަރުކޮށްފައިވަނީ ތ. ބުރުނީ މޫނިމާގޭ އުމުރުން 21 އަހަރުގެ މުޙައްމަދު އަލްސަން އިސްމާޢީލް، ގ. ހެޕީ ސައިޑް އުމުރުން 37 އަހަރުގެ އިބްރާހީމް އަޙްމަދާއި ހަމަ އެގޭގެ އުމުރުން 47 އަހަރުގެ ޙަސަން ސަހެޝާނެވެ.

މި މައްސަލައިގައި ކުރީގެ އިމިގްރޭޝަން ކޮންޓްރޯލަރު ޝަމްއާން ހައްޔަރުކޮށްފައިވަނީ މިމަހުގެ 21 ވަނަ ދުވަހު ރޭގެ ވަގުތެއްގައެވެ.

މި މީހުންގެ އިތުރުން، ކޯޓު އަމުރެއްގެ ދަށުން މ. ހަޒާރީވިލާ އުމުރުން 40 އަހަރުގެ އަޙްމަދު ލައްސާން މިއަދު ހައްޔަރުކޮށްފައިވާކަމަށްވެސް ފުލުހުން ވަނީ ވިދާޅުވެފައެވެ.

ބިދޭސީން ދިރިއުޅޭ ތަނެއް ބަލައިފާސްކުރީ އިމިގްރޭޝަންގެ އޮފިސަރުންތަކެއް މަގާމުގެ ބޭނުން ނަހަމަކޮށް ހިފައިގެނެވެ. އެ އޮފިސަރުންނަކީ ގަވާއިދާ ހިލާފަށް އުޅޭ ބިދޭސީން ހޯދައި ޑިޓެއިން ކުރުމުގެ ޒިންމާ ހަވާލުކުރި ޓާސްކް ފޯހާއި ރިސްކް މެނޭޖުމަންޓްގައި ނުވެސް ހިމެނޭ މުވައްޒަފުންތަކެއް ކަމަށް ފުލުހުން ބުންޏެވެ.