ހުޅުމާލޭގައި ގިނަ މީހުން ވަދެވޭ ގޮތަށް ހަދާ ފުޓުބޯޅަ ދަނޑަށް ފަހު މާލޭގެ ގަލޮޅު ރަސްމީ ދަނޑު ތަޅާލަން ސަރުކާރުން ވަނީ ނިންމައިފަ އެވެ. 

އެކަމާ ގުޅިގެން އެކި މީހުން ދަނީ ހިޔާލު ފާޅުކުރަމުންނެވެ. އެ ތަނުގައި ޕާކިން ޖާގަ އަކާއި ޕާކެއް ހަދަން އުޅޭ ވާހަކަ ވެސް އެބަ އިވެ އެވެ.

ފުޓުބޯޅަ އާއި ދިވެހި ކުޅިވަރަަށް އެތައް ހިދުމަތެއް ކުރައްވާފައިވާ އަހުމަދު މަރުޒޫގު ފޭސްބުކްގައި ލިއުއްވީ ގަލޮޅު ދަނޑު ތަޅާލިއަސް މައްސަލައެއް ނެތް ކަމަށެވެ. 

އަދި ވިދާޅުވީ އެ ތަނުގައި ޕާކެއް ހެދިއަސް ވެސް ގަލޮޅު ދަނޑަކީ އެތައް ހަނދާނެއް ހިމެނޭ ތާރީހީ ބިނާއެއް ކަމަށް ވެސް މަރުޒޫގު ވިދާޅުވި އެވެ. 

"އެ ތަން ތަޅާލާ އިރު އަދި ޕާކް ހަދާ އިރު ރޮސްޓްރަމް ޕްރެޒާވް ކޮށްފައި ބެހެއްޓުން މުހިންމު. ރޮސްޓްރަމް ބަހައްޓާފިއްޔާ ޕާކަށް އިތުރު ފުރިހަމަ ކަމެއް ލިބިގެންދާނެ," މަރުޒޫގުގެ ހިޔާލު ހިއްސާކުރެއްވި އެވެ.