ހާއްސަ ހާލަތްތަކުގައި ޕެންޝަން ފަންޑުގެ ފައިސާ ބޭނުންކުރެވޭ ގޮތަށް ޕެންޝަން ގާނޫނު އިސްލާހު ކުރުމަށް ނިންމާފައިވާކަން ރައީސް ޑރ. މުހައްމަދު މުއިއްޒު ހާމަކުރައްވައިފި އެވެ.

ރޭ ހެންވޭރުގެ ރައްޔިތުންނާ އެކު ބޭއްވި ބައްދަލުވުމުގައި މީހަކު ވަނީ ޕެންޝަން ފަންޑުގައި ހުންނަ ފައިސާ ބޭނުންޖެހޭ ހާލަތްތަކުގައި ބޭނުން ނުކުރެވޭތީ އެކަމުގެ ކަންބޮޑުވުންތައް ހާމަކޮށްފަ އެވެ. 

އެ މީހާގެ ސުވާލަށް ޖަވާބުދެއްވަމުން ރައީސް ވިދާޅުވީ، ޕެންޝަން ފަންޑުގެ ބޭނުން ކުރެވޭނެގޮތަށް އިސްލާހު ގެނައުމަކީ ވެވަޑައިގެންނެވި ވައުދެއް ކަމަށެވެ. އަދި އޭގެއިން ބައެއް ކަންކަން މިހާރު ފެށިފައިވާ ކަމަށާއި އިތުރު ފުރުސަތުތައްވެސް ފަހިކޮށްދިނުމަށް ދެން މަޖިލިސް ހުޅުވޭ ދައުރަށް ޕެންޝަނާއި ބެހޭ ގާނޫނަށް އިސްލާހުތަކެއް ހުށަހަޅުއްވާނެކަން އެމަނިކުފާނު ފާހަގަކުރެއްވި އެވެ.

''ހާއްސަ ހާލަތްތަކުގައި ޕެންޝަން ފަންޑުން ފައިސާ ބޭނުންކުރެވޭނެ ގޮތަށް، ދެން އެ ހާއްސަ ހާލަތްތައް އޭގަ ބަޔާންކުރެވޭނެ'' ރައީސް ވިދާޅުވި އެވެ.

ގޯތި ގެދޮރު ގަތުމަށް އަދި އިކުއިޓީ ދެއްކުން ފަދަ ކަންކަމަށް ޕެންޝަން ފަންޑުގައި ހުންނަ ފައިސާ މިހާރު ބޭނުންކުރެވެ އެވެ.