ތެލަސީމިއާ ސެންޓަރުގެ ހިދުމަތްތަކާ މެދު ތެލެސީމިއާ މީހުންނާއި އާއިލާތަކުން ކަންބޮޑުވުން ފާޅުކޮށް ރޭ ކުރި މުޒާހަރާއާ ގުޅިގެން ތެލަސީމިއާ ސެންޓަރުގެ ހާލަތު ބައްލަވައިލެއްވުމަށް ރައީސް ޑރ. މުހައްމަދު މުއިއްޒު މިއަދު ހެނދުނު އެ ސެންޓަރަށް ވަޑައިގެންފިއެވެ.، 

ތެލަސީމިއާއަށް ފަރުވާ ހޯދަމުންދާ ބަލި މީހުންނާއި އެ މީހުންގެ އާއިލާތަކުން މޯލްޑިވްސް ބްލަޑް ސާވިސަސް (އެމްބީއެސް) ކައިރީ މުޒާހަރާ ކުރީ ރޭ އެ ތަނުގެ ވެރިންނާއެކު ބޭއްވި ބައްދަލުވުމަކަށް ފަހު، އެއްވެސް މައްސަލައަކަށް ހައްލު ނުލިބޭ ކަމަށް ބުނެ އެވެ. އެގޮތުން ލޭ އެޅުމަށް ބޭނުންކުރާ ބައެއް ސާމާނު ނުލިބޭކަމުގެ ކަންބޮޑުވުން ފާޅުކޮށްފައިވެއެވެ.  އެގޮތުން ލޭ އަޅާ ޕެކެޓުތަކުގައި މައްސަލަތައް ޖެހި އަވަސް އަވަހަށް ފިލްޓަރު ބަދަލުކުރަން ޖެހުން ހިމެނެއެވެ. 

ރައީސް އޮފީހުގެ އޮފިޝަލަކު "ކުރިއަށް މީޑިއާ" އަށް މިއަދު ވިދާޅުވީ، ރައީސް މުއިއްޒު މިއަދު ހެނދުނު ތެލަސީމިއާ ސެންޓަރަށް ވަޑައިގެން އެ ތަނުގެ މުވައްޒަފުންނާއި އެތަނުގައި ތިބި ބަލި މީހުންގެ ކަންބޮޑުވުންތައް އަޑުއައްސަވައި ޑިޕާޓްމަންޓްތަކުގެ މަސައްކަތްތައް ބައްލަވާލެއްވި ކަމަށެވެ،

އޮފިޝަލް ވިދާޅުވީ، ތެލަސީމިއާ ސެންޓަރުގެ ހާލަތު ރަނގަޅުކުރައްވާނެކަމުގެ ޔަގީންކަން ރައީސް ދެއްވާފައިވާ ކަމަށާއި އެކަމުގެ މަސައްކަތްތައް މިހާރު ފައްޓަވާފައިވާ ކަމަށެވެ. 

ރައީސް އަރިހުގައި ހެލްތު މިނިސްޓަރު އަބްދުﷲ ނާޒިމް އިބްރާހިމާއި ފިނޭންސް މިނިސްޓަރު މޫސާ ޒަމީރު ވެސް ތެލަސީމިއާ ސެންޓަރަށް ވަޑައިގަތެވެ.