ފާދިއްޕޮޅު ނައިފަރަކީ ހާފިޒުންގެ މަރުކަޒެވެ. ހާފިޒުން، ހަތީބުން، އިމާމުން ޒުވާން އުމުރުގައި ދަނީ ތަމްރީނު ކުރަމުންނެވެ. ކޮންމެ ރޯދަ މަހަކު، މިސްކިތްތަކުގައި އިމާމުވެ ނަމާދު ކުރަނީ ވެސް މި ޒުވާނުންނެވެ.

މި އަހަރު ހާފިޒު ކަމުގެ ސަނަދު 24 މީހަކަށް ލިބުނު އިރު އެއް ރަށަކަށް އެންމެ ގިނައީ ނައިފަރުގެ ހާފިޒުންނެވެ. ނައިފަރުގެ 5 ޒުވާނަކަށް ސަނަދު ލިބުނެވެ. އަދި ނައިފަރުން ތައުލީމު ހާސިލުކުރި އޭދަފުށީ ޒުވާނަކު ވެސް ސަނަދު ހޯދިއެވެ. 

އެ 6 ޒުވާނުންނަކީ:

• އުމުރުން 16 އަހަރުގައި ކީރިތި ޤުރްއާން ހިތުދަސްކުރެއްވި، އާއިޝަތު ސާއިބަތު މުހައްމަދު ރިކްޒާން (ފެމެލީ / ޅ. ނައިފަރު)
• ޢުމުރުން 16 އަހަރުގައި ކީރިތި ޤުރްއާން ހިތުދަސްކުރެއްވި، އަބްދުﷲ ހަޔާން ރަމީޒް (ގުރަހަ / ޅ. ނައިފަރު)
• އުމުރުން 14 އަހަރުގައި ކީރިތި ޤުރްއާން ހިތުދަސްކުރެއްވި، އާސިރު އާރިފް ޔޫސުފް (އަޅިވިލާގެ / ބ. އޭދަފުށި)
• އުމުރުން 15 އަހަރުގައި ކީރިތި ޤުރްއާން ހިތުދަސްކުރެއްވި، އާރިޝް އަބްދުﷲ އިބްރާހިމް (އާޒް / ޅ. ނައިފަރު)
• އުމުރުން 13 އަހަރުގައި ކީރިތި ޤުރްއާން ހިތުދަސްކުރެއްވި، ޒާލިފް މަދީޙް، (ހިޔާވަހި / ޅ. ނައިފަރު)
• އުމުރުން 15 އަހަރުގައި ކީރިތި ޤުރްއާން ހިތުދަސްކުރެއްވި، އަބްދުﷲ ޒަކްވާން މުހައްމަދު ރިކްޒާން (ފެމެލީ / ޅ. ނައިފަރު)

މި ހާފިޒުން އުފެއްދެވި އެކަޑަމީއަކީ ނައިފަރުގެ ޤުރްއާން ލާނިން ސެންޓަރެވެ. އެ ސެންޓަރުގެ މުދައްރިސް، ޝައިހް އަހުމަދު ނާޒިލް އަދި އޭނާގެ ނަމުގައިވާ އިންސްޓިޓިއުޓުން ހިންގާ ސެންޓަރެވެ. 

ސަނަދު ހާސިލްކުރި ނައިފަރުގެ ފަސް ދަރިވަރުންނާއި އޭދަފުށީ ދަރިވަރަކީ ވެސް މި ސެންޓަރުގެ ދަރިވަރުންނެވެ. ނާޒިލްގެ ދަރިވަރުންނެވެ.

އިސްލާމީ ވަޒީރު ޑރ. މުހައްމަދު ޝަހީމް އަލީ ސައީދު މިއަދު ފޭސްބުކްގައި ލިޔުއްވީ ގިނަ ކުދިންތަކެއް ގުރުއާން ހިތުދަސްކުރި، ޅ. ނައިފަރުގެ ގުރުއާން ލާނިން ސެންޓަރު ތަރައްގީ ކުރުމަށް ބޭނުންވާ ވަސީލަތްތައް ހޯދުމަށް އެ ސެންޓަރުން އިސްލާމީ ވުޒާރާގައި އެދިފައިވާ ކަމަށެވެ.

ދީނީ ކަންތައްތަކަށް އެހީވާ ވަގުފު ފަންޑުން އެ ސެންޓަރަށް އެހީތެރިކަން ފޯރުކޮށްދިނުމަށް ނިންމާފައިވާ ވަޒީރު ކަމަށް ވިދާޅުވި އެވެ.