ގިނަ އަދަދެއްގެ ބަނގުރާ ފުޅިތަކަކާއެކު މީހަކު ހައްޔަރުކޮށްފިއެވެ.

ފުލުހުން ބުނެފައިވަނީ ބަނގުރާ ކަމަށް ޝައްކުކުރެވޭ އެއްޗެއް ހުރި ފުޅިތަކެއް އަޅާފައިހުރި ފޮށިތަކެއް އަރުވައިގެން ހުޅުމާލެއަށް ވޭނެއް ދަތުރުކުރަމުން ދާކަމުގެ މައުލޫމާތު އެ އިދާރާއަށް ރޭ ލިބުމާއި ގުޅިގެން އިދާރާއިން ހުޅުމާލެއަށް ދިޔަކަމަށެވެ.

ރޭ 21:46 ހާއިރު ރީތިގަސްމަގުން ވޭން ހުއްޓުވައި ބަލާ ފާސްކުރިއިރު ބަނގުރާކަމަށް ބެލެވޭ އެއްޗެއް ހުރި ގިނަ އަދަދެއްގެ 500ml އާއި 75mlފުޅިތަކެއް ފެނިފައިވާކަމަށް ފުލުހުން ބުނެފައިވެއެވެ. 

މި މައްސަލައާ ގުޅިގެން ވޭން ދުއްވަން އިން ތިރްތާ ބަހާދުރް ބީ.ކޭ(37އ) ނަމަކަށް ކިޔާ ނޭޕާލްގެ ފިރިހެން މީހާ ވަނީ ހައްޔަރުކޮށްފައެވެ. އަދި އޭނާ ދުއްވަމުން ދިޔަ ވޭން މިހާރު ފުލުހުންވަނީ ޓޯކޮށްފައެވެ. 

ފުލުހުން އަންނަނީ މި މައްސަލަ އިތުރަށް ތަހުގީގު ކުރަމުންނެވެ.